Kawrpuichhuaha ICP hmun tur enfiah

Tlabung bul Kawrpui-chhuaha Integrated Check Post (ICP) ram tur ruahman lailâwk chu, August 13, 2016 khan parliamentary secretary (Commerce & In-dustries) Jo-seph Lalhimpuia leh director J Hmingthanmawia ten a hmunah an enfiah.

Joseph Lalhimpuia chuan, kum 2005-a RITES Ltd.-in survey an neih aṭangin Kawrpuichhuah kaltlanga India leh Bangladesh insumdawn tawnna turin rua-hmanna kalpui ṭan a ni tih a sawi a, "Kawrpuichhuah ICP atana ruahmannate sorkar laipuiin a rawn hnâwl leh rih a, hun eng emaw chen hmalak a nih hnuah, sorkar laipuiin Kawrpuichhuah kaltlanga India leh Bangladesh insumdawn tawnna tur hi a hnâwl ta a ni," a ti.

Parliamentary Secretary chuan, Kawrpuichhuah ICP atana ruahmanna kalpui tihtàwp tawh tharthawh leh a nih theih nan CM Lal Thanhawla'n sorkar laipuiah a bawhzui nghal niin a sawi a, "He ruahmanna tihnun leh a nih theihna tura CM-in chak taka a bawhzui hnuah Central-in an rawn pawm leh ta hram a ni," a ti.

Joseph Lalhimpuia chuan, Kawrpuichhuah ICP tihlawhtling turin Mizoram sorkarin a ṭul apiang bawhzuia theihtawp a chhuah zel tur thu te, rawtna leh ruahmannate chu sorkar laipuia Ministry of Home Affairs hnuaia Land Port Authority of India bakah, Bangladesh sorkar la paltlang leh phawt tur a nih thu te, August 2016 chhung ngeiin MHA-ah ruahmanna thehluh tum a nih thute a sawi.

Kawrpuichhuah ICP atan hian a tirah ram hectare 8.7-a zau teh phawt a ni a, chu mi hnuah May 27, 2015-ah a hmun tlawhtu Union minister of state for Home Affairs Kiren Rijiju thusawi bawhzuiin, ICP atan hian ram hectare 17.8-a zau teh ṭhat leh a ni.

Commerce & Industries department-a Commerce Wing hotute chuan, ram pahnih insumdawn tawnna hmunpui atan ICP-in ram a duh zau lo tih sawiin, India ram hmun danga ICP dinhmun an zirchian hnuah ruahmanna awm sa aia ram zîm zawk an rawt ṭha leh tih an sawi. ICP ram tur teh ṭhat chuan ram pahnihte inkalpawhna lei (bridge) a hnaih sawt dawn niin an sawi bawk.

Ram teh ṭhat lehah hian Kawrpuichhuah ICP tura ruahman atan acre 10 vela zau teh chhin phawt a ni a; periodic pata hmanga ram nei nia inchhál mi pasarih leh VC pass nei nia inchhál mi pakhat an awm a ni.