ECI aṭanga thu la dawn loh vangin Roll-a Bru paih tur zat a la hriat loh

Tripura refugee camp-a awm Bru, Mizoram khua leh tuite chungchangah Election Commission of India (ECI) aṭanga thu dawn a la awm loh avangin Mizoram electoral roll aṭanga Bru paih tur zat hriat theih a la ni lo.

Tarlan tawh angin, Ministry of Home Affairs (MHA), Mizoram sorkar, Tripura sorkar leh Bru pawl hrang hrangte'n inremna an ziah angin, Tripura refugee camp-a Bru awm mekte chu Tripura-ah an awm hlen tawh dawn a ni. Bru-te chu Mizoram electoral roll aṭanga paih an ni dawn a, Tripura electoral roll-ah thun an ni ang.

Vanglaini palai zawhna chhangin Election department hotute chuan, electoral roll aṭanga Bru-te paih turin ECI aṭangin thu an la dawn loh avangin hmalakna an la neih loh thu an sawi a, "ECI aṭanga instruction kan hmuh hma chuan keimahni thu chuan hmalak ngawt theih a ni lo," an ti.

Election department hotu­te sawi danin, ECI aṭanga instruc­tion an dawn hunah Bru-te'n vote an neihna district-a Election hotute chu Bru-te electoral roll aṭanga paih turin hma la tura hriattir an ni ang a; district-a Election hotute chu Tripura refugee camp-ah kalin, Mizoram electoral roll aṭanga paih turte chu an endik dawn a ni. Mizorama inthlanpui hnu­hnung ber, Lok Sabha inthlanah khan Tripura refugee camp-a Bru zingah Mizoram electoral roll-a awm mi 11,990 an awm a ni. Lok Sabha inthlan hnuah Bru hruai kîr hna kalpui leh a ni a, chhungkaw 200 chuang Mizoramah an lêt a ni.

Tripura-a Bru-te hian Mizo­rama district pathumah vote an nei a; district-a vote an neih dan chu - Mamit district-ah 9,130, Kolasib district-ah 1,974 leh Lunglei district-ah 886 a ni. MLA bial ang chuan, constituency pakua - Lunglei South, Thorang, West Tuipui, Tuirial, Serlui, Kolasib, Hachhek, Dampa leh Mamit bialah vote an nei a ni.

Tripura-a Bru-te dinhmun

•    ECI aṭanga thu dawn a la awm loh avangin Mizoram electoral roll aṭanga paih hun tur a la hriat loh

•    ECI aṭanga thu dawn veleh electoral roll aṭanga paih tura hmalak a ni ang

•    District pathum - Lunglei, Mamit leh Kolasib district-ah Bru voter an awm

•    Lok Sabha inthlan hnuhnung berah Tripura-a awm Bru zingah Mizorama vote nei mi 11,990 an awm

•    Lok Sabha inthlan hnuah Bru chhungkaw 200 chuang Mizoramah an kîr