MNF MLA-te chet dan ZPM-in mak a ti Duhoma hêkna hnûk lêt turin ngen
Zoram People's Movement (ZPM) party chuan thuchhuah siamin, ZPM Legislature Party leader Lalduhoma, MLA aṭanga bàn tura MNF MLA pariatte'n hêkna lehkha, Assembly Speaker hnena an thehlut chu mak an tih thu an tarlang a, "Tuna rorel lai MNF hian kum 1987 khan independent-a dingin sorkarna an siam a ni," an ti a, an hekna hnuk kir turin an ngen.
ZPM party chuan, MNF chu rorelna ina sorkar timualphotua an ngaih Lalduhoma dah bo tumah puhin, "Opposition leader Lalduhoma thawhrimnate chhawr tangkai tum lova, sorkar timualphotu ang zawnga ngaia rorelna-in aṭanga dah bo tumna hi Mizoram mipui zahlohna leh ngaihnêpna niin kan ngai. Mipui zah vang talin he an thil tum hi hnûk lêt leh turin ZPM chuan MNF leh MNF sorkar kan ngen a ni," an ti.
ZPM thuchhuah chuan, ram rorelnah opposition chak tak an awmin rorelna a kal ngîl phah ṭhin tih tarlangin, "Sorkar puitling chuan chu chu an thlahlel hle ṭhin," an ti a; sorkar khalh ngil tumin Lalduhoma'n rim tak leh ṭhahnem ngai takin Assembly House chhung leh páwnah ṭan a la ṭhin tih an sawi.
ZPM chuan, kum 1987-a Mizoram Legislative Assembly inthlan hmasa berah MNF-te chuan recognised party an la nih loh avangin independent veka an din thu leh sorkar hial an siam tawh thu an tarlang a, "Dan mita an tlin lohnate tu party mahin hnawk an tihsak lo a, tluang taka rorel thei turin duhsakna an hlan mai a ni. An kal tawh dan anga kal ve tho, mipui rawng an bàwlpuite hnawk an ti hi a pawi tak zet a ni," an ti a; MNF chu an thuneihna hmanga a chhe thei ang bera rorel tumah an puh a ni.
ZPM Ṭhalai pawhin thuchhuah siamin, Lalduhoma, MLA a nihna aṭanga paihthlak tuma MNF party hmalakna chungchang ZPM pisaah nimin khan an sawiho a, an ṭawngṭai rual nghal thu an tarlang.
ZPM ṭhalai president Malsawmzuala chuan, ZPM MLA-te hun tawn chungchangah Pathiana rinna nghah ngam a ṭul thu sawiin, "ZPM hian tláwm têin bul kan ṭan a, tuna dinhmun sang taka kan din ve theihna hi kan chakna leh thil tih theihna vang a ni lo a, 'Ka thlarau zawkin le' titu Pathian hnathawh a ni," a ti.
Malsawmzuala chuan, "Mizoramin a la hriat ngai loh, a thlang tlingtute tana rinawm taka thawktu Pu Duhoma, Anti Defection Law hmanga MLA aṭanga paihthlak tum a nihnaah hian Pu Duhoma leh he thil vanga rilru na taka awmte tan te, hêkna thehluttu MNF MLA pariat leh Assembly Speaker tan ṭhahnemngai takin Pathian awmpuina i dilsak ang u," a ti a, an ṭawngṭai rual a ni.
Thu dawn danin, MLA aṭanga Lalduhoma bàn tura ngenna thehluttute chu MNF party aṭanga MLA pariat - Lalrinsanga Ralte (Serlui), H Lalbiakzaua (Lawngtlai East), L Thangmawia (Lengteng), H Lalzirliana (Mamit), Zothantluanga (Aizawl West-I), C Lalmuanpuia (Aizawl North-III), Ramthanmawia (East Tuipui) leh Prof. F Lalnunmawia (Aizawl South-III)-te an ni.
Assembly Speaker hnena hêkna lehkha an thehluhnaah MNF vice president Vanlalzawma'n a ṭawiawm.