Covid-19: Mizoram dinhmun Hri vei mi 22 hmuh belh a ni

September 22, Thawhlehni khan Mizo­rama Covid-19 vei mi 22 hmuh chhuah belh a ni a, an zingah Mizoram chhunga kái chhâwng an awm nual. Hripui vei hmuh tawh zat chu mi 1,713 an ni a; nimin khan hripui veite enkawlna hmun aṭangin mi 72 chhuahtir an ni thung.

Covid-19 vei Thawh­lehnia hmuh chhuahte chu - ZMC laboratory-a hmuh chhuah mi panga, Lunglei Civil Hospital laboratory-a hmuh chhuah 11 leh Rapid Antigen Test hmanga Serchhip district-a hmuh chhuah mi paruk an ni a; mipa 20 leh hmeichhia pahnih an ni.

Nimin khan Covid-19 vei dam tawh mi 72 chhuahtir an ni a; SRH-ZMC aṭangin mi 20, ITI CCC aṭangin pariat, ITI Finance Building CCC aṭangin 27, Tribal Art Centre CCC aṭangin pathum, Berawtlang CCC aṭangin 10, Pushpak CCC aṭangin pahnih leh Chhiahtlang CCC aṭangin pahnih an chhuak a ni.

Mizorama Covid-19 vei hmuh chhuah tawh mi 1,713-te chu mipa 1,394 leh hmeichhia 319 an ni a; an zinga mi 1,095 (63.92%) chu chhuahtir tawh an nih laiin, mi 618 (36.08%) chu enkawlna hmunah an la awm. La chhuak lo zingah hripui vei tawh lo an awm nual bawk. 

September 22, Thawhlehni khan ZMC Covid-19 laboratory-ah hripui vei mi panga hmuh chhuah thar a ni a, mipa pathum leh hmeichhia pahnih, Aizawl district mi vek an ni. September 16-18 chhunga swab sample lak, Mizoram chhunga kái chhâwng (local positive contact) vek an nih thu sorkar thuchhuah chuan a tarlang.

ZMC-a hmuh chhuahte hi Chanmari West venga mi pahnih - mipa kum 15 leh hmeichhia kum 44 mi te, Chanmari venga mipa kum 48 mi leh, Durtlanga mipa kum 25 leh hmeichhia kum 51 mi an ni a; Durtlanga mi pakhat zawk hi permanent address chu Mission Veng a ni. An zingah Covid-19 symptom nei an awm lo.

Lunglei Civil Hospital laboratory-a hmuh chhuah 11-te chu BSF sipai vek, kum 29-57 inkar, tun hnaia state pawn aṭanga rawn lut vek an ni a; quarantine facility-a awm lai, taksaa harsatna nei lo an ni.

Serchhipah pawh Rapid Antigen Test (RAT) hmangin Covid-19 vei BSF sipai panga leh kawngpui siamtu Prem Kram Infracon-a thawk mipa pakhat hmuh chhuah a ni a; tun hnaia state páwn aṭanga rawn lut vek, quarantine facility-a awm lai vek niin, Covid-19 symptom nei an awm lo.

September 22 khan Mizoramah mi 2,092-te swab sample endik a ni a; ZMC laboratory-ah sample 1,214, TrueNAT-PCR hmangin district district dang parukah sample 52 leh RAT hmangin district parukah sample 726 endik a ni.