Vairengte-Sairang kawng chhiat vangin truck an tlân dawn rih lo

Mizoram Truck Owners Association leh Mizoram Truck Drivers Association te chuan thuchhuah inṭâwm siamin, Vairengte leh Sairang inkar kawngpui a chhiat em avangin January 23, 2025 (Ningani) aṭangin an tlân dawn rih lo tih an puang.

MTOA leh MTDA thuchhuah chuan, vairengte leh Sairang inkar kawng, national highway chhe lutuk chungchang an ngaihtuah tih tarlangin, "Tun dinhmunah kawng chhia avangin kan truck-te a chhe nasa em em a, a khalhtute nunna atan pawh a hlauhawm tâk hial avangin January 23, 2025 aṭang chuan kan tlan ngam dawn tawh lo tih kan puang e," a ti.

Truck neitu leh khalhtu pawlte chuan, "Truck tlân ngama kawng hi siam a nih hma chuan Mizoram chhunga bungraw phur truck a tlân lo ang," an ti a; mipui hriatthiamna an dil bawk.

Press release-ah hian MTOA aiawhin general secretary Dina Tlau leh MTDA aiawhin general secretary Lalhmudika Tochhawng ten hming an ziak a ni.