Ram pum huap inkhawmpuiah Speaker Lalbiakzama a tel

India rama legislature hrang hrang (central, state leh union territory) khaikhawmtu All India Presiding Officers’ Conference vawi 85-na chu nimin khan Lok Sabha speaker Om Birla-a'n Bihar Legislative Assembly, Patna-ah a hawng a, Mizoram Legislative Assembly speaker Lalbiakzama a tel.

All India Presiding Officers' Conference hmasa ber chu kum 1921 khan Shimla-ah neih a ni a, kumin hi a vawi 85-na niin, vawiinah chhunzawma zawh a ni ang. Mizoram Speaker hi Assembly Secretariat official-te'n an ṭawiawm a ni.

Conference hawnna­ah Om Birla chuan ‘Practice and Procedure of Parliament’ 8th Edition a tlangzarh a; conference thupui chu ‘75th Anniversary of Constitution: Contribution of Parliament and State Legislative Bodies in Strengthening Consti­tutional Values' tih a ni.

Speaker hrang hrangte’n Constitution pawimawhzia leh vawnhim kawnga hmalak a ṭulzia bakah, legislative body-te’n rorelna kalphung chak, felfai leh awlsam zawk siam a nih theih nana technology changkang zawk hman ṭangkai theih dan tur sawiho a ni.