MJA-in inhlan tharna hun an hmang

MJA General Head-quarters chuan nimin khan Aizawl Press Club-ah kum thar 2025 atana inhlanna tharna leh thingpui inhona hun an buatsaih a, thuthar thehdarhtu ṭhahnem tak an tel.

Inkhawm hi MJA treasurer Lalrinmawia Sailo-in a kaihruai a; thusawitu MJA president C Lalrambuatsaiha chuan, MJA member-te chu taimakna leh thawhrimna tel loin a hlawhtlin theih loh tih hre thar turin a chah a, "Khawvel hi a thiam leh theite dinchhuahna a ni tih hriat reng a ṭul a, dam khawchhuak tura theihtawp kan chhuah loh chuan tute'n emaw min hliahkhuh mai dawn a ni," a ti.

MJA President chuan, social media leh hmasawnna hrang hrangin traditional media-te a tibuai nasa tih a sawi a; social media chu hmang ṭangkai tur leh social media chak tak kara an dinchhuah theih nan thawhrimna leh taimakna nen theihtawp chhuah a ṭul thu a sawi bawk.

Inkhawmah hian MJA General Secretary-in kum 2024 chhunga MJA hmalakna leh chêt vel dante a tarlang.

MJA hian kum 2024 khan member thar 11 an nei a, mi pathum an thi a; Mizoram pumah member 198 an awm mek. Member 198 zinga 93 chu district MJA-a awm an ni a; General Headquarters hnuaiah member 105 awmin, Aizawl khawpui chhunga mi 96 leh Saitual leh Khawzawla mi pakua an ni.