WCD-in traffic police-ah mask an pe

Women & Child Development (WCD) directorate chuan Poshan Maah (Nutrition Month) hman mek pualin nimin khan traffic police hnenah hmai tuamna (mask) ṭhahnem tak an hlân.

Hmai tuamna inhlanna inkhawm hi Aizawl Police Station-a Traffic Control Room-ah buatsaih a ni a, Traffic deputy SP K Laltluangliana'n a kaihruai. WCD director Lalpianpuii'n an department hmalakna leh kalpui dante a sawi a; Rashtriya Poshan Abhiyan (National Nutrition Mission) nodal officer Zonunpari'n  Poshan Maah chungchang leh naupang taksa leh rilru ṭhang laite enkawlna chungchang a sawi thung.

Lalpianpuii chuan, police-te leh WCD department chu thawk dun tur leh ṭang dun tur an nih thu sawiin, "Police-te hah taka ram tana an hnathawh kan hriatpui a, kan chawimawi a ni," a ti a, WCD hmalaknaa police-te nen an thawhho tawhna lawmawm a tih thu a sawi. Poshan Maah chu district leh block tinah an kalpui thu sawiin, "Naupangte ei tur ṭha leh nutrition lam hi nu kut chauh ni loin, pa kut a ni tel a ni," a ti.