KHAWTHLIR

Thisen pe

MFM School of Nursing chuan nimin khan Civil Hospital, Aizawl blood bank-ah thisen unit 20 an pe. Tunlaiin thisen pek a tlakhniam avanga Association for Voluntary Blood Donation-in thisen pe tura an ngen angin MFM School of Nursing hian thisen an pe a, petute hmeichhia vek an ni.

Tuiah tla hlum

January 17, Zirtawpni aṭanga chin hriat loa awm Zosangliana (37) s/o Rualthankhuma, Chanmari, Aizawl chu nimin chawhnu dar 1:45 khan Tlawng luiah thia hmuh a ni. Tarlan tawh angin, Zosangliana hi PHE department-a muster roll-a thawk a ni a, January 17 zan dar 8 vel khan sangha man turin a chhuak a, a bo zui a ni. Reiek kai, Tlang Lui Lidungseiah lènkhang a zar nia hriat a ni a; lènkhang a zàrnaah hian chesual palhin, tuiah a tla nia rin a ni a, Tlawng luiah hian zawn a ni.

Pastor & evangelist Hearing hun sawn

January 5, 2025-a Ajmatulaganj, Raebareli-a Sakramen ṭheh tura inbuatsaih laia man Rev. Lalzedanga leh evangelist Vanlalhuma Zadeng te thubuai chu nimin khan Raebareli District Court-ah ngaihtuah tura ruahman a ni a, mahse, hearing hun sawn hlat a ni. Pastor Lalzedanga leh Vanlalhuma Zadeng te hi Mizoram Synod hnuaia Lucknow Mission Field chhunga thawk an ni a; sakhaw inlehtir chungchangah police-in manin, thubuai an siamsak a, Raebareli District Jail-ah an táng mek a ni.

Kawng khâr dawn

Nursery Veng péngṭhuam leh Khatla bazar inkar kawng siam hna thawh a nih dawn avangin kawng hi vawiin hian zing dar 9 aṭanga tlai dar 4 thleng khâr a ni dawn a; hna thawh chhungin hna thawhna huam chhungah lirthei dah phal a ni lo.

Bawrhsapin sáwm

Serchhip DC chuan UDPA department huaihawtin District Beautification Competition neih a nih dawn thu a tarlang a; inelna tura hmachhawp hrang hrangah hian Serchhip mipuite ṭhahnemngai taka thawk a, mahni in leh a vel vawn fai leh khaw chhung chei mawi kawngah hma la tur turin a sáwm.