Bawlhhlawh thliar hranna tur sem

Kolasib Diakkawn DUDO con-ference hall-ah nimin khan 'Solid Waste Management Bye-Laws' tihpuitlinna atan bawlhhlawh ṭawih thei leh ṭawih thei lo thliara dah hranna tur bawlhlawh báwm sem a ni a, bawrhsap Dr H Lalthlangliana'n a hmanpui.

Dr H Lalthlangliana chuan, Aizawl khawpui tih loah chuan Kolasib chu Solid Waste Management Centre awmna hmasa ber khawpui a nih thu sawiin, "Kumin October thla chhungin a taka hman ṭan beisei a ni. Kolasib hi khaw thlêng rem tak a ni a, Solid Waste Management Centre kan nei bawk a, inkaihhruaina dan kan nei tawh. Mizoram chhunga khaw fai ber kan ni thei a ni,” a ti. 

Kolasib DC chuan, VC member-te chu khawtlang faina kawnga hruaitu leh kawhhmuhtu nih tum tura fuihin, bawlhhlawh ṭawih thei leh ṭawih thei lo thliar hranna báwm chu a nihna tur ang taka hman a nih theih nan ṭha taka bawhzui turin a chah.

Bawlhhlawh siam tlem zawngin chhung tin an inzirtir a pawimawh thu sawiin H Lalthlangliana chuan, "Khaw fai leh thianghlim kan hriatte hi khawtlang ṭangrual leh thawhhona ṭha awmna a ni zel," a ti a, thawhhona boruak ṭha nena khawtlang faina kawnga hma la turin a sáwm a ni.

Bawlhhlawh báwm hi Kolasib khawpui chhunga VC 17 hnenah sem a ni a, in 7,662 hnenah pek chhuah a ni ang.