8th Schedule-a Mizo ṭawng telh pawimawhna Speaker-in a sawifiah

Nimin khan Bihar khawpui Patna-ah All India Presiding Officers' Conference 85-na neih a ni a; Mizoram Assembly speaker Lalbiakzama'n thu sawiin, India Danpui 8th Schedule-a Mizo ṭawng telh ve a ṭulna leh pawimawhnate a sawi.

Assembly Speaker chuan, India Danpui 8th Schedule-a Mizo ṭawng a tel ve theihna tura hmalaknaah thawhpui turin Lok Sabha speaker Omla Birla, Rajya Sabha deputy chairman Harivansh Naryan Singh leh ram hruaitu dang kal khawmte a ngen a ni.

India ram chu Mother of Demo­cracy tia sawi hlawh hial a nih thu sawiin Lalbiakzama chuan, "Hnam leh ṭawng chi hrang hrang infinkhawm 'Unity in the midst of diversity' tih theih phah­na khawpa ram danpui duang chhuaktute an fakawm. Cons­ti­tution ṭha leh hlu tak hi vawn him zel a pawimawh," a ti.

Sakhaw zalenna chungchangah Constitution-in a tarlan ang ngeia khua leh tui zawng zawngte'n an duh zawng sakhua an zui zel theih nan Constitution vawn him kawngah ṭan la zel turin kal khawmte Assembly Speaker chuan a ngen.

Lalbiakzama chuan, sakhaw zalenna ram ropui tia sawi ṭhin India ramah inrahbehna awm ṭhin chu pawi a tih thu sawiin, "December 29, 2024-a Howrah, West Bengal-a Kristian minority-te chunga thil thleng kha a demawm hle," a ti a; Howrah-a thil thleng chungchang West Bengal speaker Biman Banerjee hnenah ziaka a thlen chu rang taka a lo bawhzui avangin a lawm thu a sawi.

Assembly Speaker chuan, Parliament leh state legislature-a mipui tana thil ṭha tak tak an lo ruahman ṭhinte a sawi a, "A bik takin MGNREGS (Mahatma Gandhi National Rural Employment Guarantee Scheme) leh NFSA (National Food Security Act)-te hi mi náwlpui leh mi hnuaihnungte tan a ṭangkai hle a ni," a ti.

All India Presiding Officers' Conference hi January 20, Thawhṭanni khan ṭan a ni a, nimin tlai khan zawh a ni.