Vairengte-Sairang kawngpui siam chungchang PWD-in an sawifiah

Mizoram PWD chuan Vairengte-Sairang national highway chhia chungchangah thuchhuah an siam a; kawngpui chu siam mek a nih thu an tarlang.

PWD chuan, "January 20, Thawhṭanni aṭang khan PWD chuan Vairengte leh Sairang inkar kawngpui chu war-footing-in siamṭhat hna a kalpui a, hei hian WBM material-a pothole repair leh sidedrain repair-te pawh a huam," an ti.

Tarlan tawh angin, Mizoram Truck Owners Association leh Mizoram Truck Drivers Association chuan Vairengte leh Sairang inkar kawngpui a chhiat em avangin January 23, 2025 aṭangin an tlân dawn rih loh thu January 20, 2025 khan an puang a ni.

PWD tarlan danin, Vairengte leh Sairang inkar kawngpui siam hna thawk turin labour 20 rual Mega Food Park-ah an riak lut a, Khamrang-Selesih péng bul siam zawh a ni tawh. Khamrang thlen hmaa Tuitun lei bul leh Rengtekawn velah hna thawh ṭan a ni a, hna thawhna atan JCB, vibratory roller leh tipper-te a hmunah dah a ni.

Vairengte-Sairang kawng hi Ministry of Road Transport & Highways chuan National Highways & Infrastructure Development Corporation Limited (NHIDCL) enkawl turin gazette-ah a chhuah tawh a; mahse, PWD-in hna kal lai pahnih - Bilkhawthlir-Kolasib leh Kawnpui-Khamrang an la chang a, a bak zawng chu NHIDCL hnenah an hlan tawh.

PWD chuan, Bilkhawthlir-Kolasib leh Kawnpui-Khamrang chu NHIDCL hnena hlan turin nikum khan hna thawh zawh tawh a ni chungin, Khamrang-Kawnpui bik chu contractor-in maintenance a tih ṭhat theih loh avangin contract tihtawpsak a nih thu an sawi a, "He lai kawng ṭha lo thawm ṭhat nan MoRTH-in Mizoram sorkarah maintenance fund pe thei tawh lo mah se, Mizoram sorkar chuan fûr chhunga ṭha taka lirthei an tlan leh theih nan cheng nuai 75 chu WBM pothole repair nan a lo pe tawh a, thawm ṭhat mek a ni," an ti.

PWD-in a la enkawl NH kawngpuite chu NHIDCL lamin nikum December thla tawp emaw, kumin January thla tir lamah emaw an la tawh dawn angin sawi mah se, an remchang leh tak loh thu PWD chuan an tarlang a, "PWD tan enkawl chhunzawmna tur sum MoRTH aṭanga dil chhuah theih a nih tak loh avang leh NHIDCL chu sanction thar dil theitu zawk an nih tawh avangin NHIDCL kutah hlan tum a ni," an ti a; NHIDCL enkawl zui tur ni mah se, an remchan leh tâk loh avangin Mizoram PWD-in kawng khuar hnawhna tur sum sorkarah an dil mek thu leh chumi hmachhuan chuan hma an lak nghal thu an sawi bawk.