VC thlan chungchanga social media-a thu dik lo thehdarhtu chhui turin police hriattir

Mizoram State Election Commission (SEC) chuan village council inthlanpui awm tur kaihhnawihah thu dik lo social media-ah vawrh darh a awm niin an hria a, thu dik lo thehdarhtu chhui chhuak turin district hrang hranga superintendent of police (SP)-te a hriattir.

SEC hian Aizawl, Lunglei, Serchip,Champhai, Mamit, Kolasib, Saitual, Khawzawl leh Hnahthial district-a SP-te hnenah January 20, Thawhṭanni khan lehkha a thawn a; VC inthlanpui neih turah candidate qualification chungchangah thu dik lo social media-ah thehdarh a nih avangin, thu dik lo thehdarhtu chhui chhuak turin a hriattir a ni.

SEC-in a tarlan danin, tun hnaia social media-a thu dik lo thehdarh chu, "Village council term chu February. 19 ah a tawp tawh dawna khawtin a VC ding tu candidate te pawh an in puah chah nasa khawp ang le. Amah erawh chu mipui in kan hriatve hrim hrim atan tarlang lawk ila.. BPL&AAY dawng bik ho sawrkarin miretheia chhiar tel te chhungkua te chu VC ah an ding thei dawnlo tih hriat a tha ang,.ding an awm a nih chuan complain te a awm palh a nih chuan Election Commission in an cancel sak thei ang,” tih a ni.

SEC chuan VC candidate ni thei chin (qualification) a tarlang nghal a; candidate qualification chungchangah Lushai Hills District (Village Councils) Act, 1953 leh Mizoram (Election to Village Councils) Rules, 2014 bak notifi-cation chhuah a awm loh thu a tarlang.