VC/LC inthlanin zirlai exam hun a tibuai turah AAP-in an ngai

Aam Aadmi Party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; February 12, 2025-a village council leh local council thlan tur chuan zirlaite exam hun a tihbuai thu an sawi.

AAP president Andrew Lalremkima chuan, Mizoram puma zirlaite exam pui (promotion exam) neih thlaah inthlan buatsaih a ni tur chuan zirna kaltluang lai a sut buai thu a sawi a, "Chhan mumal sawi tur awm loa VC/LC inthlan hun sawn hma a ni hi mak kan ti hle. Sorkar hian inthlan an sawn hma chhan mumal takin mipuite min hrilh rawh se, chhan mumal sawi tur an hre lo a nih chuan mipui zah lohna lian takah keini chuan kan ngai. MBSE hnuaiah HSLC leh HSSLC exam inbuatsaih a ṭul avang leh exam ṭan hun lai a nih dawn avangin zirna-in leh zirlaite chungah a chhe zawngin nghawng a neih ngei a rinawm," a ti.

Zirlaite tana hun pawimawh tak nena insu buai zawnga inthlan buatsaih tum a ni chu pawi an tih thu sawiin Andrew Lalremkima chuan, "Polling station atan zirna-inte hman ṭhin a nih avang leh zirtirtute BLO atan ruat an nih ṭhin avangin zirna-in leh an enkawl zirlai naupangte'n an tuar ngei ang tih hi kan sorkar hian a hmu thiam lo nge, a hmu duh lo tih hi kan zawhna a ni," a ti. Inthlan avanga ni sariha board exam sawn hma a ni chuan zirlaite tan inbuatsaihna hun a tihtlem phah thu a sawi bawk.