MPF-in VC/LC inthlan an thlir lâwk

Mizoram People Forum (MPF) General Headquarters Governing Board chuan nimin khan Synod Office-ah village council leh local council inthlan awm tur an thlir lâwk a; MPF president hlui leh tharte'n mawhphurhna an inhlan bawk.

MPF inkhawmpuiin MPF Danpui a lo tih danglam tawh angin Governing Board chuan an ṭhutkhawm hmasakah MPF president atan Rev. RC Lalnghakliana, Synod moderator an lo thlang tawh a; President thar hian president kal chhuak Rev. R Vanlalnghaka hnen aṭangin nimin khan mawhphurhna a la a ni.

MPF ṭhutkhawmah hian February 12, 2025-a VC leh LC inthlan tur chungchang thlirin, hmalak dan tur an sawiho a; MPF general secretary Rev. Lalramliana Pachuau chuan MPF constituency forum leh district forum-ahte hmalakna tur kaihhruaina an thawn chhuah tawh thu a sawi.

VC leh LC inthlan turah hian MPF chuan inthlan thuchhuah tihchhuah an tum a, inthlan thuchah chu print media leh electronic media-ah tihchhuah an rel a ni.