Mamitah contact tracing kaihhruaina duang
Nimin khan Mamit bawrhsap Dr Lalrozama hoin DC conference hall-ah Covid-19 hnu chhuina (contact tracing) atana zawm tur kaihhruaina, Standard Operating Procedure (SOP) duan a ni.
Dr Lalrozama chuan, hripui dona kawngah fimkhurna chu hmanraw ṭha ber a nih thu sawiin, "Mask vuah, social distancing ngaih pawimawh, ṭul loa páwna chhuah leh ṭul loa punkhawm loh tum hrâm hrâm tura mipui fuih a ṭul. Mahni theih ang anga inveng a, hri hi kan kai palh a nih pawhin mi dang kan kai darh loh nan fimkhur taka khawsa tur kan ni tih hi thupui bera neiin, mi dang hriattir leh zirtir pawh kan mawhphurhna ṭheuha ngaih a ṭul," a ti.
Mamita contact tracing SOP duan
▷ Covid-19 positive, primary contact an awmin chanchin kimchang Health department-ah pek vat tur a ni a, primary contact chênna veng leh biak theihna neih vat tur a ni. Health department-in a ṭul angin police leh VTF-te nen hma an la ang.
▷ Primary contact chu amah a inkhung hrang nghal tur a ni.
▷ Primary contact-te chenna leh contact verification tih zawhah a kalna leh mi dang a contact chhui zui tur a ni. Health department, police leh VTF-te'n a ṭul angin hma an la ang.
▷ Secondary contact-te mahni inah inkhung hran phawt tur a ni a; Health department, police leh VTF-te a ṭul anga hriattir tur.
▷ Inkhung hran laiin VTF-te'n an vil chhunzawm ang a, a remchan danin Health department staff-te'n an pui ang. Mi dangin an tlawhpawh lohna turin lehkha ziakin an in kawngkharah chiang takin 'Home quarantine: Tlawh phal loh' tih tàr tur a ni.
▷ Covid-19 positive, primary contact chu a ṭul dan azirin Rapid Antigen/RT-PCR test ni se (contact a nih aṭanga ni 5 hnuah), secondary contact-te chu primary contact a negative chuan test loh tur a ni ang a, Covid-19 laka invenna sorkarin inkaihhruaina a siamte an zâwm chhunzawm ang. Primary contact a positive chuan secondary contact-te swab test tur a ni.
▷ Contact tracing hi felfai taka a tih theih loh chuan a ṭul angin DC-in containment area a puang ang.
▷ Mizoram sorkar thuchhuah zûlzui zela contact tracing, quarantine, etc. kalpui tur a ni.
▷ VTF-te'n DC thu loin lockdown/containment area puan loh tur a ni.