India Independence Day lawm a ni Kan sorkar chhung NLUP kan kalpui dawn: CM

India Independence Day vawi 70-na chu nimin khan ram pumah lawm a ni a, Mizorama a lawmna pui ber, Lammuala neihah chief minister Lal Thanhawla'n hnam puanzar a pawt pharh. CM chuan thuchah sawiin, "Kan sorkar chhung chuan NLUP hi kan sem zel dawn," a ti.

Chief Minister chuan, Mizoram mipuite chu Independence Day chibai bûkin duhsakna a hlân a, "Kum 69 kal ta vawiin ni angah hnehchhiahna thim chhah tak ata ênna hmuin, awpbehna nghawngkawl tihtliah a ni a, mi dangte rinchhan loa mahni ke ngeia ding chhuakin, zalenna kawng zawh tura mi dangte cho chhuaktu kan ni hial ta a ni," a ti.

Lal Thanhawla chuan, India ram a zalen theihna atana inpe pumhlûmte - Mahatma Gandhi, Jawaharlal Nehru, Sardar Vallabhai Patel, Maulana Abul Kalam Azad leh mihuai kal hmasate hriat reng an nih thu a sawi a; zahna chibai bûk tur leh ram tana inhlân thar turin ram mipuite a sáwm.

NLUP hnuaiah sorkarin chhhungkaw 1,30,000 hnenah ṭanpuina an pek tawh tih a sawi a, "Kan sorkar chhung chuan NLUP kan sem zel dawn. Sum sem
ṭha ti lo awm mah se, kan sem loh chuan sum nei lo an tam si a, mipuite retheihna aṭanga chhanchhuah nan kan sem dawn. Chuta tan chuan NEDP kan ruahman a, NEDP-ah hian kum 2016-17 chhung atan cheng vbc. 250 dah a ni," a ti.

Hawla chuan, mipui himna atan sorkarin dan leh thupek kenkawh a ngai pawimawh tih sawiin, hemi kawngah harsatnate awm ve mah se, a ṭha thawkhat tih a sawi a; Bureau of Police Reforms & Development (BPRD) chhût danin, kum 2013 leh 2014 chhungin Mizoram police-te chu IPC hnuaia thubuai ngaihtuah zat aṭanga chhûta thil sual tite thiam loh chantir tam ber an nih thu a sawi.

Chief Minister sawi danin, kum 2014-15 ah Mizoramah buh metric ton 60,647 thar a nih laiin, 2015-16 ah 2.29%-a pungin, metric ton 62,089 thar a ni. Kum 2014-15 chhungin ram hectare 20,377-a zauah oil palm chin a ni a, kum 2015-16 ah erawh chuan hectare 23,358-a zauah chin a ni.

Hawla chuan, Mizorama vawk natna PRRS a leng chu pawi an tih thu sawiin, tihtawp a nih theih nan nasa taka ṭan lak a nih thu te; Bairabi-Sairang inkara rêl kawng siam mek chu kum 2019-ah zawh tum a nih thu te, kawng thar 79, km. 1,885-a thui siam mek a nih thu te a sawi. Hei bakah hian Tuirial Hydro Electric Power project chu kum 2017-ah zawh tum a nih thu te, PHE department-in kum 2015-16 chhunga tui thianghlim pek a tum khaw 31 zinga khaw 28 tuam a nih tawh thute a sawi.

State Referral Hospital, Fal-kawnah medical college din ngei tum a nih thu te, MAP leh IR battallion pasarihah State disaster Response Force (SDRF) dinin police 747-te zirtir chhuah an nih tawh thu te, Mizo ṭhalai thiamna bik neite'n ram páwnah hna an hmuh theih nan sorkarin hma a lak thute a sawi bawk.

CM hian Esther Lal-venpuii, Hrangchhuana High School zirlai, parade an zirna aṭanga vanduaina tâwka a thi chu pawi a tih thu leh a chhungte a tawrhpui tak zet thu a sawi.

Independence Day-ah hian CM Lal Thanhawla chuan parade-a tiṭha te, medal leh award hrang hrang dawngtute hnenah a hlan a; a lawmnaah hian minister, MLA leh sorkar official ṭhahnem tak an tel.