Mizo ṭhalai bum ching Guwahati-ah an awm
Mizo ṭhalai eng emaw zat chu Guwahati-ah training an neih zawha hna thawk tura thlêm thlak an ni ṭhin a, a thlémtute'n an intiam anga an awmtir leh si loh avangin harsatna an tawh phah fo.
Vanglaini palai zawhna chhangin Guwahati Mizoram House assistant resident commissioner (ARC) C Lalfakzuala chuan, Mizo
ṭhalai company lemin an bum an tam tawh thu a sawi a, "An mangan hnuah Mizoram House an rawn pan a, a thlawnin kan thlentir bakah Guwahati Mizo Welfare hotute nen ṭang tlangin a theih ang angin kan buaipui ṭhin," a ti a; mi eng emaw zat chu a thlawna Mizorama thawn haw an nih tawh thu a sawi.
C Lalfakzuala chuan Mizo ṭhalaite fimkhur se a duh thu sawiin, "Company lemin an bum lohna atan sawmna an hmuhin a lem a ni lo tih chiang taka an finfiah a nih loh chuan hnar ngam a ṭha," a ti.
Tun hnai khan company lem pakhat chu hming chi hrang hrang invuahin, Mizoram aṭangin ṭhalai eng emaw zat Guwahati-ah an thlêm thla a; training an buatsaih hnuah hlawh nei turin an tiam. Guwahati-a an thlen hnuah in pakhatah khung khawmin, security despoit atan Rs. 15,000 an laksak a, chawhmeh mumal pawh pe loin an awmtir a ni.
An bumte zinga mite'n Vanglaini an hrilh danin, a khát tâwkin thil eng eng emaw zirtir an ni ve ṭhin a, mahse, an sawi angin pawisa an pe lo. Pawisa an dil pawhin, mi dang pali an hmuna an hruai phawt loh chuan pawisa an hmuh theih loh thu an hrilh ṭhin. Hetiang a nih avang hian an hmuna thlêm tur an zawng ve leh
ṭhin a ni. He company lemah hian Mizo ṭhalai 50 vel an awm ṭhin a, an tlan chhuak tawh hlawm a ni.
Company lem hian mi an thlêm dawnin hming hrang hrang an hmang a, lehkhabu leh video eng emaw zat an nei a; mahse, an lehkhabu leh video awm angte chu an tihlawhtling ngai lo a ni.