KHAWTHLIR

Food Festival

Mizoram Synod hnuaia Masihi Sangati Kendra chuan, nimin khan Millennium Centre tualah Independence Food Festival 2016 buatsaih. Food Festival hi Governor Lt.Gen. Nirbhay Sharma chuan nimin tlai khan a tlawh. Larsap chuan, ṭawng hrang hmang leh khawsak phung inang lo, India ram chhung state dang aṭanga rawn kalte leh Mizo mipuite inkawm ngeih zawkna tura Masihi Sangati Kendra hma-lakna chu a thlawp thu a sawi a, "Food Festival hi hnam hrang hrangte tan intawhkhawmna hun remchang leh rilru inpawh tlang taka inkawm theihna hun remchang a ni," a ti.

Heroin man

SRS-te chuan Pathianni zan dar 8 vel khan Chanmari West-a Hniang-chani in luah aṭangin heroin hawng 6 (grams 84.744) an man a, Rs. 3,00,000 hû a ni. SRS tarlan danin, Sawmi, Zokhawthara awm chuan Aizawlah heroin a thawn ṭhin a, mi panga a zawrh chhawntir ṭhin a; Sawmi man turin SRS-te chuan theihtawp an chhuah mek a ni.

Special clinic

Aizawl Civil Hospital chuan MJA member-te tan special clinic an buatsaih dawn a, vawiin chawhma dar 10 hian Medical Superintendent office-ah hawn a ni ang. A hawnna ah hian Aizawla MJA member awmte chu tel vek tura beisei an ni.

Thilpek hlan

Health minister Lal Thanzara chuan nimin khan Mamit District Hospital leh Shelter Home a tlawh a, damdawi-ina awm mi 21 leh home-a awm naupang 19-te hnenah thilpek a hlan.

Lawmman hlan

Animal Husbandry & Veterinary department chuan, nimina Kawnpuia Indepedendence Day hmanaah NLUP dawngtu thawk ṭha an thlan chhuah mi pathum hnenah lawmman an hlân.

Freedom March

Sorkar laipuiin zirna inte a ngen angin RIPANS chuan Independence Day denchhenin Pathianni zan khan an hmunah 'Candle Light Freedom March' an nei a, he hunah hian kum 1947 a piang mi eng emawzat sawm an ni a, chawimawina thilpek
an hlan.