Hmun hrang hrangah I-Day lawm a ni

Nimin khan Mizoram hmun hrang hrangah Independence Day vawi 70-na lawm a ni a; minister, parliamentary secretary leh MLA-te'n an hmanpui.

Independence Day hi Lungleiah chuan Ṭhuamluaia Mualah lawm a ni a, speaker Hiphei khuallian niin, parade contingent 23-te'n hnam puanzar chibai an bûk a chháng lêt.

Hiphei chuan, "Kan ram zalenna atana inpe mi huaisen kal tate vanga vawiin thleng thei kan ni. Kum 69 chhungin kan ṭhenawm ramte an danglam chak a, a ṭhen sipai rorelnaah tlu lutin inawpbehna hnuaiah an awm laia keini dan rorelna fel tak, democracy hnuaia kan awm chu a thlamuan thlak hle a ni," a ti.

I-Day lawmna hi Siahaah chuan district khelmualah hman a ni a, minister PC Lalthan-liana'n hmanpuiin, parade contingent 15-in hnam puanzar chibai an bûk a chháng lêt.

PC Lalthanliana chuan, Mizoram sokarin dan leh thupek kenkawh chungchangah theihtawp a chhuah tih sawiin, "Mipuite himna turin theihtawp chhuaha hmalak a ni. Mizoram police-te tichak turin hmasawnna ruhrel tam tak din a ni," a ti.

Lawngtlaiah chuan CYLA khelmualah lawm a ni a, minister Zodintluanga khuallian niin, parade-te'n hnam puanzar chibai an bûk a chhâng lêt.

Zodintluanga chuan, Mizoram sorkarin mipuite tana hmasawnna ruhrel a dinna turin New Economic Development Policy duan a nih thu a sawi a, "Kum 2016-17 chhung atan cheng nuai 25000 a ruahman a ni. Kawng hrang hranga hmasawnna khalh kaltu nia ngaih ruahmannate bitumin, hmasawnna ruhrel din sate a hmang ṭangkai ang. NEDP ken tel pawimawh em em chu, kan tih dan
ṭhin leh kan ngaihtuahna hlui hnuchhawn a, thil tihdanglam tam tak kan nei tur hi a ni," a ti.

Serchhipah chuan I-Day hi Khawtetlang DC playground-ah lawm a ni a, minister John Rotluangliana'n a hmanpui a, parade contingent 11-in hnam puanzar chibai an bûk.

John Rotluangliana chuan, ralmuang tak mipuite kan nun theih nana theihtawp chhuah a nih avangin Mizoram chu state ralmuang ber pawl a nih thu a sawi a, "Zalenna hnuaiah mipuite'n hmasawnna rahbi an zawh theih nan NLUP kalpui a ni. NLUP hi Serchhip district-ah phase hnihah chhungkaw 6,171 pek tawh an ni a, phase thumna leh lina hnuaiah chhungkaw 3,370-te ṭanpuina pek mek an ni," a ti.

Champhaiah chuan minister H Rohluna hoin Chhangphut Field-ah lawm a ni a, parade contingent 31-te'n hnam puanzar chibai an bûk. I-Day pual hian football, basketball leh rifle inkahsiakahte inelna buatsaih a ni.

H Rohluna chuan, remna leh muanna boruak ṭha tak hnuaiah lo chuan hmasawnna a kal chak thei lo tih sawiin, "Dan kengkawhtu te, tlawmngai pawl te, kohhran te, thuthar thehdarhtute leh mipui vantlang thawhhona vangin Mizoram hi ram puma state muanawm berte zinga mi kan la ni thei zel a ni," a ti.

Kolasib-ah chuan I-Day hi Ṭumpui Field-ah lawm a ni a; khuallian Home minister R Lalzirliana chuan, retheihna aṭangin khawsak zângkhai zawkna kawng zawh nan Mizoram sorkarin New Economic Development Policy a duang tih sawiin, "NEDP hi tluang taka kalpui a nih chuan ṭhalai rualte tan eizawnna ngelnghet tam tak a chhawp chhuak ang a, mi tam takin eizawnna tur inhlawhna ngêlnghet an neih phah dawn a ni," a ti.

Kolasib-a I-Day lawmnaah hian parade contingent 18 awmin, armed contingent pakhat, unarmed contingent panga, school contingent 11 leh DIET contingent pakhat an ni.

Mamitah chuan I-D hi GSA playground-ah lawm a ni a, minister Lal Thanzara'n a hmanpui.

Lal Thanzara chuan, NLUP hnuaiah ei leh bara intodelhna atan chhungkaw 1,30,000 ṭanpuina pek an ni tih sawiin, "Sorkar chuan hmasawnna tluantling leh huapzo ruahmanna thar NEDP, Comprehensive Growth Strategy for Mizoram a duang a. 14th Finance Commission-in kalphung a her danglam thlir chunga Act East Policy leh ram sumpai dinhmun ṭhan zel dan mila duan a ni," a ti a; NEDP hmanga mipui remchang siam sak an nih tur thu a sawi.

Independence Day hi SDO (Civil) leh BDO ṭhuthmunahte leh hmun dang eng emaw zatah lawm a ni bawk.