Mi in luah chungchangah dan siam tum

Mizoram sorkar chuan Aizawl khawpuia in neitute leh in luahtute inkara in luah dan leh a kaihhnawih hrang hrangah dân siam a nih theih nan a buaipui mek a, a hming atan, 'The Mizoram Urban Areas Rent Control Act' tih a ni.

Thu dawn danin, kum 1974 khan, 'The Mizoram Urban Areas Rent Control Act 1974' siam a lo ni tawh a; tuna dan thar an siam tur hi Assembly-ah pass a nih hunah dan hlui hi a thlak dawn.

The Mizoram Urban Areas Rent Control Bill hi UDPA-in National Model Urban Rent Control Bill zûlzuia an siam a ni a, Law & Judicial department-in an enfiah nawn (vet) tawh a; GAD-in hun an enzui hnuah UDPA-ah thawn leh tawh a ni a, Council of Ministers pawmpui tura buaipui mek a ni.

Law & Judicial department hotute chuan, The Mizoram Areas Rent Control Act nei tura hmalak-naah hian March 27, 2015-ah an lo pawm tawh thu an sawi. GAD hotute chuan, khawpuia in luah dan kalphung chu ngaihsaktu awm loa hun rei tak a awm avangin sorkarin a ngaihven ṭan nia sawiin, India ram khawpui danga an tih dan tam tak chu kalpui a hun ve ṭan nia an ngaih thu an sawi.

UDPA hotute chuan, in luahtu leh a neitu inkara dan siam tura an buaipui chu Law & Judicial department-in March 27, 2015-ah pawmpui tawh mah se, a subject chu UDPA subject a nih chiah loh avangin GAD-ah hun rei tak chai hmasak a ngai niin an sawi a; khawpuia in neitu leh a luah danah khuahkhirhna hnuaiah a awm ve a ngai tulh tulh dawn niin an sawi bawk.

Bill-a rawtna ṭhenkhatte

1. In luah man felfai tak (rent agreement) a awm tawh dawn a, in neitu leh a luahtute inkarah ṭawngkaa sawi mai loin, felfai takin ziaka dah zel a ni tawh ang a, stamp registration-ah inziah luh tur a ni a, luah hun chhung turte pawh kimchang taka ziah tur a ni.

2. Mi luah tura in neitute'n an in chu luah tlâkin an siam tur a ni a, in luah man inpek hunah receipt inpek zel tawh tur a ni ang.

3. Controller an awm tawh dawn a, in luahtu leh in neitu inkarah thubuai a awm chuan Controller hnenah thlen tur a ni a, judicial proceeding anga kalpui a ni ang a, thubuai azirin Rs. 10,000 thleng chawi theihna turte a awm.

4. In luahtute hnawhchhuah mai mai a theih dawn tawh lo. Inchhuahtir theih chhan tur tarlan zingah, in luahtuin thla thum chhung luah man a pek loh vang a nih a ngai; in luahtuin a tira inremna ang loa a awmin chhuahtir theih an ni ang; in neituin an luah duh vangin an chhuahtir thei ang, tihte a tel.