CYLA-in thu dik tâwk lo chhuahah MCSA an puh

Central Young Lai Association (CYLA) chuan thu-chhuah siamin, kumina Remna Ni hman chungchanga Central YLA leh Lawngtlai DC office-a thawk MCS pahnihte an inhmuh thiam lo vanga MCS Association-in thuchhuah an siam chu thu dik tâwk lo a nih thu an tarlang.

Central YLA chuan, Lawng-tlaia MCS pahnihte sawn chhuak turin hun tiam neia sorkar an nawr loh thu sawiin, "Kan boruak kal zel pawh dâi zui mai tura kan ngaih laiin, MCS pahnihte hian vawiin thleng hian remna kawng zawng tura hma an la duh miah lo hi CYLA thawhpui duh lo leh hnam inhmusitna tàwpah kan ngai a, an thil tih dik loah hian inchhirna an neih lohzia an tilang chiang hle," an ti.

Lawngtlaia Remna Ni hman a nihin district administration bultumin mi tlem têin an hmang tih tarlangin CYLA chuan, "Sorkar hmalak tumna leh sorkar rilru ang taka hman tumna a ni lo," an ti a; Remna Ni hmang thei loa Lawngtlai district mipuite siam an ni chu political party hrang hrangte pawhin an dem thu an sawi.

CYLA chuan, MCS pahnih-te sawn chhuah an phût chung-changah zâwldawh takin sorkar hmalakna an ngaihchàn reng thu an sawi a, "Thil ṭha lo zawk a thlen zui zel loh nan CYLA chuan kan thiam ang tawkin hma kan la zui zel a, kan sorkar chak tak pawh hian kan harsatnate hi min hriatthiampui se kan duh hle a ni," an ti.