Kum tharah thil tum thar neih tum turin Chief Minister-in Mizo mipui a sáwm
Chief minister Zoramthanga chuan kum thar thuchah a sawi a; Mizo mipuite chu kum tharah thil tum thar neih tum ṭheuh turin a chah.
Zoramthanga chuan, kum tharah thil tum thar, resolution thar mi tinin an neih ṭhaa a hriat thu sawiin, "Keimahni mimalin kan mamawh ṭheuh, kum thar lo thleng tur atan hian eng nge kan mamawh ber kan hre ṭheuhin ka ring, chu mi-ah chuan tumna thar i nei ang u," a ti a; ruih theih thil vanga buaina nei zawng zawngte'n Pathian ṭanpuinain hnehna an nei thei a ni tih hria a, tumruhna nen kum thar hmuak turin mipui a sáwm.
Kum thar chu ṭum dang anga hman a nih chuan a hlâwk dawn lo tih sawiin Chief Minister chuan, "Pathianin khawvelah engkim hneh theihna min pe tih hre thar ila, kan nun kawng min tibuai ṭhintute hi hneh vek ila, tichuan tumna thar nen he kum tharah hian Zoram hi inbuatsaih thar ang u," a ti.
Zoramthanga chuan, Pathianin ram ropui, hausa, boruak nuam leh rálmuang Mizote a pe tih sawiin, "A hmang thiam kan vannei a, a hmang thiam lo kan vanduai. A duh apiang hman thiam theih a ni. Tumna thar nen Pathian ṭanpuinain hnehna kum puanah i hmang vek ang u," a ti a; tumruhna nei turin Mizo mipuite duhsakna a hlan.
CM Zoramthanga chuan, social media kaltlang pawhin Mizo mipuite kum thar chibai a bûk a; kum 2020 chu malsawm kum ni se a duh thu tarlangin, "He kum 2020 hi in tan kum ṭha leh kum hlu tak, damlo te, khawhar lusûn te, ruihhloin a tihbuaite leh harsatna hrang hrang kum hluia tâwkte tan malsawm kum lo ni ṭheuh se," a ti. Pathian malsawmna dawng tlakin mi dangte tan malsawmna nih ṭheuh tum tura chahin Chief Minister chuan, ram leh hnam hmasawn nan rilru thianghlim tak nena thawkho turin mipui a sáwm a ni.