Agriculture Minister-in Sawhthing a vailiam

Agriculture minister C Lalrinsanga chuan January 31, Zirtawpni khan Haulawng aṭangin Mission Organic Value Chain Development for North Eastern Region (MOVCD-NER) scheme hnuai­ah Lunglei Organic Ginger Producer Society (LOGPS)-in sawhthing an thar chhuah metric ton 40 a vailiam.

C Lalrinsanga chuan, LOGPS hmalakna fakawm a tih thu sawiin, "Kan buh leh thlai enkawlnaah chemical fertilizer leh hlo thahna damdawite kan hmang uar lutuk hian kan leilung leh boruak a tihchhiat mai bakah, mipuite hriselna thui takin a nghawng a ni," a ti a; ram changkang zawkte tih dan leh mipui hriselna atana pawimawh a nih avangin Mizoramah organic farming uar taka kalpui tum a nih thu a sawi.

LOGPS hian kum 2017 aṭangin MOVCD-NER scheme hnuaiah organic farming atan hma an la a, tunah hian khaw 13-ah ram hectare 679-a zauah chhungkaw 646-in hma an la mek. Kum 2018-19 chhungin sawhthing ton 400 chuang thar chhuakin, an sum hmuh belhkhawm hi cheng nuai 150 chuang nia chhût a ni.

MOVCD-NER scheme hi kum 2016-ah sorkar lai­puiin India hmarchhak state pariatte tan a ruahman a, kut hnathawktute'n kum tin lo vâta khamkhawp ngawr ngawr an thar ṭhin chu hlâwk zawk leh awmze nei zawka organic farming hmanga hlâwk zawka an thar chhuahte an hralhna aṭanga sum lak luhna ṭha zawk an neih theih nan ruahman a ni. Mizoramah kut hnathawktu intél khâwm (farmer producer company) 14 an din tawh a, ram hectare 13,000-a zauah lo neitu mi 14,104-te'n ram hlâwm hrang hrangah thlai thlan bik hmangin hma an la mek.

LOGPS hian tun din­hmunah, AGA organic industry-te nen inremna siamin, a thawh khatna atan sawhthing ton 100 an hralh phawt dawn a, hralh chhuah tur an neih dan azirin rate fel tak siamin an hralh leh zel dawn a ni.