CM Zorama'n Foreign Secretary a kâwm

Chief minister Zoram­thanga chuan January 22, Nilaini tlai khan New Delhi-ah Ministry of External Affairs-a secre­tary (foreign secretary) Harsh Vardhan Shringla leh a thawhpuite a kâwm a; Myanmar nen­a inlaichìnna leh a kaihhnawih thil pawi­mawh­te a sawipui.

CM Zoramthanga chuan, April 2008-a India leh Myanmar sorkarin inremsiamna an ziah hnua Kaladan Multi Modal Transit Transport Project (KMMTTP) kawngpui siam mekah, a tam zawk siam zawh ni tawh mahse hmun ṭhenkhatah, a bikin Myanmar ram lama hna a muan thu a sawi a; Myanmar ram lamah chak zawka kawng siam a nih a, project chu zawh thuai a nih theih nan hma la turin Foreign Secretary chu a ngen a ni.

Chief Minister chuan, Myanmar leh Asia chhim­chhak ram dangte nen inlaichìnna ṭha zawk India-in a neih theihna tura Act East Policy siam chu hmarchhak state tan a pawimawh avang leh, hmarchhak state-te chu luhka pawimawh a nih dawn avangin kawng hrang hrangah hmarchhak state-te ngaih pawimawh leh zual a ṭul thu a sawi.

Zoramthanga chuan, Myanmar rama Mizoram depa awm Chin state mipui tam zawk chu Zo hnahthlak an nih avangin, India leh Myanmar inlaichìnna tihnghehna atan Mizoram leh Chin state inlaichînna tihṭhat lehzual a pawimawh thu a sawi a; Indo-Myanmar insumdawn tawnna a ṭhan len zel theih nan lirthei leh mihring tan awlsam zawka ramri paltlang theih dan tur ngaihtuah a pawimawh thu a sawi bawk. Chief Minister hi Plan­ning Board vice chair­man H Rammawi leh Mizoram sorkar official dangte'n an ṭawiawm a ni.