CYMA hmalakna dodalin gas phur duh lo Gas phur dan khawmte CYMA-in an kaltir

Central YMA hnuaia Kumpuan duty-te'n tun hnaiah gas phur truck-te'n gas an tihchingpen an man chhuah ṭhin avangin gas phurtu driver-te an lungawi lo a, gas phur duh loin ni hnih chhung an ding. Gas phur driver-te chuan Mualkhanga Gas Bottling Plant manager hnenah an lungawi loh thu an thlen.

Mualkhang Gas Driver Association (MGDA)-in tun hnaia Mualkhang Gas Bottling Plan manager hnena lehkha an thehluhah chuan, sorkara thuneitu ni lote'n kawng laka an challan leh gas bûr ruakte an lo laksak ṭhin chu an duh loh thu leh thuneitute'n tihtawpsak tura an ngennate an ziak a, "Vawiin dt. 13.8.2016 aṭangin tiamchin awm loin load kan la tawh lo ang," an ti. An lehkhaah hian president Vanlalzawna leh secretary Lalrinliana Sailo ten hming an ziak.

Driver-te lungawi loh avang hian gas phur chhuak tur hnam dang truck-te chu MGDA member-te'n an lo dang nia hriat a ni a; hei vang hian Central YMA hruaitute chu Mualkhangah kal nghalin, gas phur truck-te chu an tlantir nghal a ni. CYMA vice president Vanlalruata chuan, "Mi pahnih khat thil tih vanga mipuiin kan tuar hi a
ṭha lo hle a ni," a ti.

He thil avang hian August 13, 2016 khan FCSCA department director room-ah CYMA leh FCSCA hotute chu an ṭhukhawm a, hmalak zui dan tur an rêl a ni.

Central YMA thu

CYMA Vice President chuan, "Driver-te hian YMA hminga kawng laka an challan-te laksak an awm ṭhin niin an sawi a, kan han zawt chiang a, sawi tur an hre mumal si lo. Duh tâwka gas an tihchingpen theih tawh loh vanga hetianga an che mai hi a dik lo a, Mizo pahnih vel an lo ni. Kan zilhhau a, Zirtawpnia load la si, Thawhṭannia an chhuak thei chauh kha an kawhmawh bâwl dan a ngeiawm hle a ni," a ti a; Mizo driver-te chu an khak thu leh mi pahnih khat thil tih mai a nih thu a sawi.

Vanlalruata chuan, August 17 hian Mualkhangah IOC hotute an kal dawn nia an sawi avangin lo hmuh an tum thu a sawi a; gas bûr ruak an man chungchang, "Kan ngaih a ngam hma chuan kan kawl rih ang, pek chhuah ngam chi niin kan hre lo. Bûr 400 chuang kan man tawh a, bûr ruak ber a awm loh chuan nasa takin khawih chingpenna lakah kan vengah kan inngai," a ti.

Sorkar lamin Mualkhang aṭanga gas phurh chhuah vên a tum chungchangah Vanlalruata chuan, "Escort an sawi a, tumah an kal ngai kan hre lo. An escort a nih pawhin hmutu an awm kan hre lêm lo," tiiin a sawi.

FCSCA department thu

FCSCA department hotute chuan, harsatna siamtute chu Mizo driver pahnih/khat an nih thu te, Plant manager hnena lehkha an thehluh hnuah manager-in driver-te'n eiruk tum vanga mipuiiin an tawrhna chu a duh loh thu a sawi niin an sawi a, "Driver-te'n harsatna an siam chuan IOC leh carrying contractor-te inkar ni mah se, Essential Commodities Act hmangin hrem theih an ni," an ti.

Supply department hotute chuan, mi pahnih/khat vanga harsatna a awm loh nan FCSCA department-a inspector-te leh Legal Metrology depatment-te'n dan anga chêt an tum thu an sawi a; Mualkhang aṭanga gas phur truck vên chungchangah, "Kan vil ve reng a, gas phurtu pakhat department mi pakhatin a zui zel chuan kan tan indaih ngaihna a awm lo. Gas tihchingpen hi zan lamah a nih deuh zel avangin office hna piah lama kal reng tur chuan a harsa a ni," an ti.

Gas distributor thu

Mizoram Indane Distributor Association (MIDA) secretary Zosangliana chuan, tun hnaia gas bûk tling nei tura CYMA hmalakna chu lawmawm an tih thu sawiin, "Kan thlâwp em em a, hmalakna duhthusam a ni. Gas lo thleng hi kan bûk a, a bûk tling chiah consumer-te hnenah kan pe ṭhin," a ti a; gas bûk tling chiah hralh an duh thu a sawi.

Zosangliana chuan, MIDA-in kum kal taah pawh CYMA chu gas bûk tling lo chungchang sawipui tura an lo ngen tawh thu te, thil dik lo titute do tura ṭan lakho a ngaih thute an lo thlen tawh thu leh an sawiho tawh thu a sawi a; gas bûk tling lo chu an phurh lettir tawh thu leh mipuite'n an nghah peih ve a ngaih thu sawiin, "Mipui hian tawrh peih ve deuh hlek ila, kan ṭhat tlanna tur a ni," a ti.

Police lam hmalakna

Police hotute pawhin gas khawih chingpen chu an ngaihsak ve reng nia sawiin, Mualkhang leh a chhehvelah chhun leh zanah pawh an kal fo thu te, uniform ha lo pawha kal cháng an neih thu leh mi panga vel an tirh ṭhin thute an sawi a; duty ve mah se, YMA lam an chêt hnuah chuan man an nei lo niin an sawi bawk.