7th. Pay atana sum mamawh tur Finance dept.-in an chhût mek

Mizoram sorkar chuan Finance department hnenah Mizoramah 7th. Pay Commission hman ni ta se, sum engzat nge sên belh ngai tur chhût chhuak turin a hriattir.

Finance department hotute aṭanga thu dawn danin, 7th. Pay hman a nih vanga Mizoram sorkarin sum a sên belh ngai zat tur hi chhût mek a ni. Hetih lai hian, Mizoramah 7th. Pay hman a nih dawn leh dawn loah thutlukna siam a la ni lo.

7th. Pay atana sorkar laipuiin ruahmanna hrang hrang a siamah, pay scale siam a nih tawh loh avangin engtia kal zel tur nge a nih an la hriatthiam bik loh thu Finance department hotute chuan an sawi.

Sorkar laipui chuan, 7th. Pay hi sorkar hna-thawkte lakah September 1, 2016 aṭangin a hmang ṭan dawn a, India ramin sum kum khat chhunga a sum sen belh tur chu cheng vaibelchhe nuai 1.02 a ni a, hei hi India GDP aṭangin 0.7% vel ni tura ngaih a ni.