Aizawl Civil Hospital-ah lungawi lohna leh rawtna neite tan box 17 dah

Aizawl Civil Hospital (ACH) hotute chuan, mipui rawng an bawlna kawngah anmahni an inenfiah vena atan hospital compound chhungah complaint box 17 an dah.

ACH-in MJA-te tana special clinic an buatsaih tur chu nimin khan ACH Medical Superintendent pisaah hawn a ni a, ACH hotute chuan an hmalakna leh an ngai-mawhte MJA member-te an hrilh a,

ACH medical superintendent Dr KL Remsanga chuan, an inenfiahna atan hospital compound chhungah complaint box 17 dah a nih thu sawiin, "Hemi bawhzui tur hian Customer Care Service Committee din a ni a, box-a miin an thil dahte uluk takin kan zir chiang ṭhin. Box
aṭanga complaint lut vanga staff bânte pawh kan nei tawh a ni," a ti.

Thawktute'n damlote an enkawl-naah harsatna a thlen lohna atan damlo kan hun an siamte mipuiin zâwm se an duh tih sawiin Dr KL Remsanga chuan, "A hun loa damlo kan tum an awm hian harsatna a awm ṭhin," a ti a; damlo kan hun chu zing lamah dar 7-9 leh tlai lamah dar 3-5 a nih thu a sawi.

Medical Superintendent chuan, "Emergency treatment pek ngai a nih loh chuan OPD hun chhung a nih chuan emergency room pan loin, OPD pan hram hram ni se. Emergency department hian hmun kan neih a ṭhat tâwk loh avangin mipui mamawhna hi kan phuhru zo lo a, admit ngei ngaite pawh kan admit thei lo," a ti.

ACH hotute chuan, civil hospi-tal pantu tam ber chu khawsak harsa zawke an nih thu sawiin, "Damdawi-ina enkawl 30%-40% vel chu sorkar aṭanga hamṭhatna BPL leh RSBY hnuaia mite an nih avanga a thlawna enkawl an ni. BPL tan hian an identity card an ken chuan a thlawna investigation tihsak theih a ni a, hei hi hre lo tam tak an awm," an ti.

Sorkarin mipuite tana ham-
ṭhatna a siam hnuaiah bill theih chin, bill theih loh chin leh pawisa pek ngai loa a thlawna damdawi-ina awm theihnate mipuiin hre chiang se an duh thu sawiin ACH hotute chuan, "BPL leh RSBY hnuaiah a thlawna damdawi dawn theihna a ni. In admit hmain RSBY counter-ah in report ngei a ngai thung," an ti a; hriat chian loh vanga harsatna tawh phah an awm thu an sawi.

ACH hi tun hnai khan Quality Assurance Assesment Team-in an endik a, point 70 an pe a; India ram puma pahnihna nih phak tuma ṭan an lak mek thu a sawi.

MJA special clinic-ah hian ACH hna-thawkte chuan MJA member-te hriselna dinhmun a thlawnin an endiksak dawn a ni.