Mimal kuta hlan MIFCO hun hriat loh

Mizoram sorkarin public sector undertaking (PSU) zinga mimal kuta hlan (privatise) a tum, MIFCO chu engtikah nge mimal kutah hlan a nih dawn hriat a la ni lo a, ruahmanna kalpui mek a ni.

Thu dawn danin, tun hnai khan MIFCO privatise tum a nih chung-chang hi Finance department, Industries department leh MIFCO hotute'n an sawiho a; March 2017 hmaa MIFCO privatise hman tum ni se, an ti.

MIFCO thil neih hrang hrangte hlut zawng chhût chhuak turin consultant rawih tum a ni a, consultant-te'n hna an zawh hnuah thuneitute hnenah an thehlut ang a, an report chu thuneitute'n an zir chiang leh phawt ang.

MIFCO privatise tura thutlukna siam a nih avang hian thawktu mi 56 chuan Early Retirement Rules (ERR) hmangin an hna chawlhsan turin thutlukna an siam a; mi 21 chuan sorkar (department dang)-a thawh zui zel an thlang thung.

Mi 56-te ERR hmanga an chhuah hnuah sorkar chuan ERR hmanga chhuah theihna chance August 15, 2016 thleng an hawng leh a, mi 21 zingah chhuak duh an awm belh lo.

MIFCO Board of Directors tun hnaia ṭhukhawm chuan, MIFCO-a thawk sorkara la awm duh mi 21-te chu sorkar department danga an luh theih dan tur kawng dapsak an rel a ni.

Board of Director ṭhutkhawm ṭuma tarlan danin, MIFCO hian hmachhawp eng emaw zat neiin, Bung Bangla-a ran talhna chu sorkar laipui nena ṭangkawpin din thar leh turin hma an la mek a; thawktu tur contractor pawh thlang tawhin, a hmunhma siam rem hna ṭan tawh a ni. Sairang Food Processing Plant-ah mineral water siamna khawl bun tuma hmalak a ni a, hna thawktu tur an zawng mek.