Aizawl tihhmasawn nan vbc. 48.67 dawng dawn

Urban Development and Poverty Alleviation (UDPA) department chuan, Aizawl khawpuia hmasawnna hna chi hrang hrang thawhna turin sorkar laipuia Ministry of Urban Development aṭangin cheng vbc. 48.67 a dawng dawn a, first instalment cheng nuai 734 an dawng tawh.

UDPA-in Aizawl tihhmasawnna tura sum a dawn tur cheng vbc. 48.67 hi kum 2015-16 leh 2016-17 atana Central-in a rawn pek tur a ni a; first instalment a rawn pek tawh cheng nuai 734 chu K-Deposit-ah dah a nih hnuah lak chhuah leh a ni tawh a, a khawihtu tur PHE leh PWD kutah pek a nih hnuah hna ṭan nghal tum a ni.

PHE leh PWD-in hna an thawh turte chu, tuihâwk luankawr siam ṭhat te, leimin, tui pût leh lei tlahniam vênna siam te, Aizawla septic tank technology thar hmanga kalpuina turte a ni ber a; UDPA department hotute chuan, chhiat-na laka Aizawl vênna hna thawhna tur a ni deuh ber tih an sawi.

Aizawl hmasawnna hna chi hrang hrang thawhna tur dawnah hian kum 2015-16 chhung atan Central lam chuan cheng nuai 4168 a rawn phalsak.

PHE department kaihhnawih hna thawh tur chu project hmingah Water Supply tih niin, PHE tui pipe chhia aṭanga tui pût siamṭhatna tur leh a kaihhnawih hrang hrang atan a ni. Chuta tan bik chuan cheng nuai 405 ruahman a ni a, Central-in nuai 364 tumin, state sorkarin nuai 40 a tum ang.

Septage Mangement & Bio Digester project atan cheng nuai 405 ruahman a ni a, Central-in nuai 364 leh Mizoram sorkarin nuai 40 an tum ang. Tuihâwk luankawr (drainage) siam ṭhatna atan cheng nuai 2595 ruhman a ni a, Central-in nuai 2336 leh Mizoram sorkarin nuai 259 an tum dawn a ni.

Kum 2015-16 chhunga hman tur zingah hian Urban Transport tia vuah, kea kalna tur siam nan cheng nuai 547 ruahman a ni a, Central-in nuai 492 leh state sorkarin nuai 54 an tum dawn. UDPA hotute chuan, Aizawl khawpuiah lirtheiin hmun a chan tam avang leh kea kal an tam avangin kea kalna tur hmun zau zawk siamna tur a nih thu an sawi.

Green Space & Park tia vuahah cheng nuai 101 ruahman a ni a, Central-in nuai 91 leh state-in nuai 10 an tum dawn. He project hmang hian Aizawl City Park siam ṭhat tum a ni.

Ministry of Urban Development hian kum 2016-17 chhunga hman turin cheng nuai 4667 a phalsak tawh bawk a; a hmanna tur chu kum 2015-16 chhunga hman tur nen a hming inang hlawm mah se, hna thawh tur erawh a danglam dawn.

Water supply atan project pathumah hna thawh a ni dawn a, Central-in cheng nuai 1396 leh Mizoram sorkarin nuai 155 a tum dawn.

Aizawl Greater Water Supply Scheme Phase-I pipe puak ṭhin thlâkna tur leh tui semnaa pipe aṭanga mipuiin hnai taka an pawh theihna atana ruahmanna a ni. Tui haw chánga tui meter-a tui kal dan thlakna tur 'Pressure Reducing Valve' siamna tur a ni ber. Sewarage and Septage Management atan project pakhat awmin, Central-in nuai 330 leh state-in nuai 37, a vaiin 367 dah a ni.

Tuihâwk luankawr project pakhat atan cheng nuai 2267 (Central-in nuai 204 leh state-in nuai 227) dah a ni a; Urban Transport atan Multi Level Car Parking project siam niin, Central-in nuai 330 leh state nuai 37 an tum ang a, a vaiin nuai 367 a ni. Green Spaces and Parks atan cheng nuai 116 (Central-in nuai 105 leh state-in nuai 11) a awm bawk.