Central Jail-ah concert buatsaih

Prison Ministry India, Mizoram chuan nimin khan Prison Break Ministry nen ṭang-kawpin Central Jail-ah 'Homecoming Concert' an buatsaih a, Home minister R Lalzirliana'n a hmanpui.

Home Minister chuan, jail táng tlân chhuak awm leh ṭhin chu pawi a tih thu sawi-in, "Mizoram zímtêah jail táng tlân chhuakte chu man leh vat an ni
ṭhin a, an tàn hun kum belh leh ṭhin a nih avangin a hlâwk lo. Sorkar chuan jail tángte hamṭhatna tur leh an tàn chhung hun an hmang ṭangkai theihna turin skill development lam pawh a ngaihtuah mek zel a ni," a ti.

PMI-Mizoram chairman Aizawl bishop Most Rev. Stephen Rotluanga pawhin thu sawiin, "Pathian kaihhruaina zarah kum 10 chhung rawngbawlna tluang taka kan nei thei hi a lawmawm hle," a ti a; jail an tlawh apianga lawm leh phûr taka anmahni lo dawngsawng ṭhintu jail thawkte leh tángte chungah lawmthu a sawi.

Prison Ministry India hi mi tlawmngaite'n kum 1986 khan an din a, PMI branch 850 hnuaia volunteer 6,000 chuangte chuan India ram pum huapin jail 1,397-ah rawngbawlna an kalpui mek a ni.