Zu zawrh hi kohhran ṭawngṭai chhânna a ni lo - Zoramthanga

MNF president Zoramthanga chuan, chief minister Lal Thanhawla’n awmze neia zu zawrh chu kohhante ṭawngṭai
chhànna nia a sawi chu Pathian leh kohhran mipui thamlohna a nih thu a sawi a, "Zu zawrh hi khawi kohhran ṭawng-
ṭai chhanna mah a ni lo a, Bhavan duh dana zu zuar an ni a, puh tur dang zawng suh se," a ti.

Nimina Mizo Hnam Runa inkhawmah thu sawiin MNF President chuan, "AMC sorkar hmasaah Congress leh ZNP-in sorkarna an siam a, Aizawla motor parking fee khawn pawh an kutah a awm. Hun kha chen parking fee an khawn chungin sawiselna a awm lo. Tunah MNF sorkarin kum hmasa lam aiin Rs. 8,25,000-in target an tisâng tawh zawk a ni," a ti a; chuti chunga parking fee khawntu thlan dan sawisel an awm chu demawm a tih thu leh AMC tender danah a chháng sáng leh hniam apiang pek tur tih a awm lo niin a sawi.

ZNP leh MPC-te'n North East Democratic Alliance (NEDA)-a MNF an tel ve an sawisel chungchangah Zorama chuan, "Kum 2014 MP inthlanah opposition party ṭangrualte'n candidate inṭâwm neiin, United Democratic Front kan din a, a tu ate mahin kan party lungphûm leh kan din-chhan kan tlansan lo," a ti. NEDA chu inchhûnfinna pawl ni loin, thawhhona huang a nih thu sawiin, "Kum 50 chhung min awptu Congress-in hmasawnna nei loa hmarchhak min rahbehna lak ata tâl chhuak tura thawhhona a ni a, MPC leh ZNP-te hi an tênau deuh a, tel ve tlakah an ngai lo a ni," a ti.

MNF President chuan, Prime Minister Office-in amah chu NSCN-K hruai-tu Khaplang be turin an nawr reng nia sawiin, "Burma lam pawhin Khaplang hmu turin min nawr reng bawk,” a ti a; NSCN-K vanga India leh Myanmar-a buaina awm chingfel turin Pathianin MNF a ruat niin a sawi.