Parade-a tel tur zirlai thi ui thu an puang

MSU chuan thuchhuah siamin, Hrangchhuana High School-a zirlai, Esther Lalvenpuii (14) d/o Themthiamkimi, Zawlnuam Bawrai, Independence Day lawmnaa parade tur a inbuatsaih laia August 13, 2016-a a thi chu pawi an tih thu an tarlang.

MSU chuan, Esther Lalvenpuii thih danah tumah dem tur an awma an hriat loh thu an sawi a, "Chutih rualin, sorkar hun pawimawh atana a inbuatsaihna lama boral a nih avangin, sorkarin râlna pe ngei se kan duh," an ti.

MSU chuan, Independence Day leh republic Day parade-a zirlai luhai leh tlu an tam lutuk ṭhin chu ngaihthaha en liam mai lo a, a chhan chhui chiang tur leh, zirlaite hrehawm lutuk lo leh an hriselnain a tawrh lohna tura ngaihtuahna seng turin sorkar an phût a; New Delhi-a I-Day 2016 lawmnaah pawh Prime Minister thusawi laiin zirlaite chu an ṭhuttir vek niin an tarlang.

Hachhek Constituency Development Committee pawhin thuchhuah siamin, Independence Day parade zirna aṭanga thi, Esther Lalvenpuii, Zawlnuam Bawrai, Hrangchhuana High School-a kal mek chu an ui thu an ui thu an tarlang. "Tun hnuah parade practice dawnin thuneitute'n zirlaite hriselna endik fo se kan duh hle a ni," tiin, sorkar ruahmanna programme-a thi a nih avangin sorkarin ràlna pe ngei se an duh thu an sawi.