Pasaltha Khuangchera chawimawi dawn Zirlai pawl pahnihin dodal an tum Mizo freedom fighter chawimawi kan tum - BJP

BJP, Mizoram Pradesh bultumin vawiin hian Ailawngah Mizo pasalṭha Khuangchera chawimawi a ni dawn a, Union minister of state for Railways Rajen Gohain chu khuallian tura beisei a ni. Hetih lai hian, MZP leh MSU chuan, India zalenna sualtu zinga Khuangchera chhiar a, chawimawi tum nia ngaiin dodal an tum. Chawimawina huna khual zahawm tura awm Art&Culture minister R Romawia chuan tel a tum loh thu a sawi.

Mizoram BJP-te chuan, Khuangchera chu Mizote tana beitu (Mizo freedom figher) a nih vanga chawimawi tum an nih thu an sawi a; Art & Culture minister R Romawia chuan, Khuangchera chawimawinaa khualzahawm tura an sawmna chu a tihhlawhtlin dawn loh thu Vanglaini a hrilh.

Sorkar laipui ruahmannain India ram tana zalenna sualtu, chawimawi hlawh lote chawimawi an ni dawn a, hmarchhakah chuan mi 10 chawimawi tura tih niin, chu'ng zingah chuan Khuangchera telh a ni. Chawimawina inkhawm buatsaihna hmunah Union Minister tel tur ruat vek an ni.

Khuangchera chawimawina hi vawiin hian Khuangchera Hall, Ailawngah inkhawm buatsaih a ni dawn a, khuallian Union minister of state for Railways Rajen Gohain niin, khualzahawm-ah Art & Culture minister R Romawia ruat a ni. BJP national secretary Farukh Khan, BJP Mizoram hruaitute leh Khuangchera chanchin ziaktu Prof. Laltluangliana Khiangte, Mizoram University-te chu thusawi tura tih an ni.

Hetihlai hian, zirlai pawl pahnihte hruai-tute chu nimin khan an ṭhukhawm a, Khuang-chera chawimawi tumna programme a hlawhtlin lohna atan hmalak dan tur an rél a, Indian freedom fighter atana Khuangchera puan an duh loh thu hi ziakin prime minister Narendra Modi hnenah an thlen nghal.

MZP leh MSU ngaihdan

MZP leh MSU-te chuan, British sorkarin an ram zauh tuma Mizoram an rawn thlen laiin India hnuaiah emaw, ram dang hnuaiah emaw Mizoram a awm loh thu sawiin, "British ho lo dotu pasalṭha huaisen Khuangchera leh kan pasalṭha dangte khan India tan an do lo a, Zofate tan an do zawk a ni. Chu chu kan history a ni a, history a tihdanglam theih loh. India sorkar hi kan history zahsak turin kan beisei a ni," an ti a; Khuangchera chu a nih lohnaah puh an phal loh thu an sawi.

Khuangchera chu India tana zalenna sualtu anga ngaih a nih chuan Mizo nationalism tihdal tumnaah an ngaih thu sawiin, zirlai pawl hruaitute chuan, "He thilah hian Mizo mipui tumah inhnamhnawih lo turin kan ngen. British ho lo dotu mi eng emaw zat lal ropui tak tak leh pasalṭha dang tam tak kan neih laia Khuangchera chauh an rawn mal thur nalh hian ngaih a tiṭha lo a, a phênah thil eng emaw a awm ngei kan ring. Khuangchera leh British dotu kan pasalṭha dang zawng zawngte kha India mi an ni lo," an ti.

BJP thu leh hla

BJP (Mizoram) president Prof. JV Hluna chuan Vanglaini zawhna chhangin, pasalṭha Khuangchera chu India tana independence sualtu a nih vanga chawimawi tur a nih loh thu a sawi a, "Sorkar laipuiin Mizo zingah India tana zalenna sualtu chawimawi tur thlang turin min ti a, Mizo zingah India tana zalenna sualtu an awm loh bakah, India-in independent a sual chu Mizote'n kan ngaih-sak loh hrim hrim thuin kan chháng," a ti.

Prof. JV Hluna chuan, Mizote tana zalenna sualtute sorkar laipuiah an thlen nia sawiin, "Mi hrang hrang kan ngaihtuah hnuah pasalṭha Khuangchera hi a âwm bera kan hriat avangin a ni hi kan rawt a ni," a ti a; chawimawina inkhawm buatsaihna atan pawh a tirah chuan Art & Culture-in Khuangchera thlân an siam rilrûk mah se, a chenna Reiek ni ṭhin, tuna Ailawng ni ta chu an thlan thu a sawi.

Sorkar laipuiin Mizote tana theihtawpa beitu chawimawina hun buatsaih an hriatpui tur chu thil lawmawm tak nia an hriat thu sawiin, JV Hluna chuan, "Hetiang a nih laia kan dodal a nih chuan kan tan a ṭha lo zawk mai thei," a ti.

Mizoram BJP-te'n sorkar laipui
aṭanga an lehkha dawn, Vanglaini palai an peka Khuangchera chanchin a inziah dan chu, 'He was the first Mizo freedom fighter to lay down his life fighting British imperialism. He was killed while trying to resist advancing Bristish troops in 1890, which saw British troops in 1890, which saw the British conquest of The Lushai Hills (now Mizoram). He died fighting to the last drop of his blood' tih a ni.

Art & Culture Minister thu

Art & Culture minister R Romawia chuan Vanglaini palai zawhna chhangin, pasalṭha Khuangchera chawimawinaa khualzahawm tura an sâwmna chu a tihhlawhtlin dawn loh thu a sawi.

R Romawia chuan, programme-ah amah ráwn hmasa loin khualzahawm tura tih a nih thu a sawi a, "August 16, 2016-ah office bân tawh hnuah kan inah sàwmna lehkha an rawn dah chauh a. Sawmnaa telephone number inziak hnenah NGO emaw, sorkar inrawlh lohna political party bil programme a nih avangin ka tel theih loh tur thu ka hrilh," a ti.

Mizoram BJP-ten amah ráwn loa khualzahawm atana telh ringawt chu, "Kan BJP unaute zingah politics khawvela tawnhriat la ngah lo an tam avangin protocol thil an hre lo a ni mai thei. Sàwm lâwk loa programme-a min dah hi an tlin tâwkah ka ngai," a ti a; tun hnuah chuan a remtihna hmu hmasa lo chuan programme-ah telh tawh lo se a duh thu a sawi.

Zawhna chhangin Art&Culture Minister chuan, pasalṭha Khuangchera chawimawi turah hian engmah hrilhhriat an nih loh avangin, department-in ngaihdan siam turin ngaihtuahna an la sên loh thu a sawi.

Political party leh NGO

MPC party chuan thuchhuah siamin, Mizo pasalṭha leh huaisen Khuangchera India sorkarin India freedom fighter-te zinga pakhata puan a tum chu an remtih loh thu an tarlang a, "Khuangchera hian India zalenna sualna kawngah India ram tan pên khat pawh a pên loh laia India zalenna sualtute zinga telh ve tumna hi India ramin Mizote min hmuhsitna leh min thamlohnaah kan ngai," an ti.

MPC chuan, Khuangchera chuan India ram tan ni loin, Mizo hnam humhim nan a nun a hlân tih sawiin, "Mizote awp beh tuma sap ho Mizorama lo luh tum dodalin theihtawpin a nunna chán hial khawpa beiin a lo do zawk a ni," an ti a; Khuangchera chu India freedom fighter ni loin, Mizo freedom fighter dik tak a nih zawk thu an sawi.

Zo Re-unification Organisation (ZORO) pawhin thuchhuah siamin, Khuangchera chu India chhan vanga nun chán anga sawi a, India freedom fighter zinga telh a ni chu hriatthiam harsa an tih thu an tarlang a, "Hetianga dâwt hulhual buaipui an awm ta mai hi ṭha lo kan ti hle a, a lo puibâwmtu tualchhung mite pawh hnam pawi khawihna an ni tih hriaa tawpsan turin kan ngen a ni," an ti.