KHAWTHLIR

Thisen pe

Lawngtlai College chuan nimin khan an college-ah blood donation camp an huaihawt a, Lawngtlai District Hospital tan mipa 31 leh hmeichhia pariatin thisen unit 39 an pe.

ILP enfiah

Young Lai Association sub-headquarters, Sangau, Lai Students Association sub-hqrs, Sangau leh police ṭanghote chuan nimin khan Sangau khaw chhunga hnam dangte zingah Inner Line Permit (ILP) an enfiah. Sangau YLA president LS Lalhmingthanga chuan, sorkar hnathawk ni lo hnam dang, Sangau leh a chhehvela awmte chu dan ngai pawimawh tur leh an ILP neih dan anga awm turin a chah.

Zu man zat

Excise & Narcotics department chuan, July 2016 chhung khan zu zuar 48, zu rûi 65, rakzu litre 970.4 , sap zu ûm puitling 390 leh zu kaih-hnawihah lirthei pahnih an man.

NLUP sem

Agriculture department chuan, nimin khan Sihphir community hall-ah NLUP hnuaia leilet (WRC-II) thlangtu
chhungkaw 89 hnenah ṭanpuina sum an sem a, bialtu MLA leh Assembly deputy speaker R Lalrinawma'n a hmanpui. Sum hi chhungkaw 89 hnenah Rs. 44,000
ṭheuh pek a ni.

Teachers Day

Kolasib DC H Lalengmawia hoin nimin khan DC conference hall-ah Kolasib district-a Teachers Day hman dan tur sawiho a ni a, kuminah chuan day puala zirlaite thil zawrh tir ṭhin chu tihtawp a nih dawn thu tarlan a ni.

Zawrh phal lo

Food Safety commissioner Dr K Ropari, Health principal director chuan thuchhuah siamin, tunlaia chawhmeh tihrimtui nana hman lâr, Kame Meat Masala chu State Public Health Laboratory, Guwahati-a endiknaah, hriselna atana thil pawi thei rawng hman phal loh pawlh a ni tih hmuhchhuah a nih thu a tarlang a; Kame Meat Masala chu lei tawh lo tur leh a zuartute pawh zuar tawh lo turin a hriattir.