HBC zirlaite hmaah Zorama'n thu a sawi

Hrangbana College-a Political Science department-in an sawm angin, MNF president Zoramthanga chuan nimin khan Chanmari YMA Hall-ah zirlaite hmaah Mizo National Movement chungchang a sawi.

Zoramthanga chuan, Mizote chu tu'ma hnuai leh rahbeha awm lo, mahnia ro inrela awm ṭhin an nih thu sawiin, "Bristish hoin min awp luih hnu leh min chhuahsan dawn thleng pawhin, Pu Nehru-a'n 1946-a tribal-te chungchang a hrilhfiahnaah pawh, India, Burma leh East Pakistan hnuaia awm lo, British ram awp luih, ramri hrûla mite kan nih sawiin thupuan a lo nei tawh a ni," a ti.

British hoin Mizoram an chhuahsan dawnah Mizote awm dan turah zawhna a awm tih sawiin, Zorama chuan, "Duh dan hrang panga - India, Burma, East Pakistan-a awm te, a ṭhenin British awpna hnuaia la awmte leh independent duh pawl an awm," a ti a; Mizoram chu India hnuaiah district council pakhatin a awm ta niin a sawi.

Zoramthanga hian MNF-in Mizoram independence an puan dan te, India sorkar an do dan leh ramhnuaia an awm dante a sawi bawk.