Dihmunzawla PHE in leh tuizem thiahnaah MNYF-in eirukna awm ngeiah an ngai

MNF ṭhalaite chuan, Dihmunzawla PHE building hlui leh tuizem ṭhiahna atana Rs. 63,08,504 sen a nih danah eirûkna a awm ngeia an ngaih thu an sawi a; chhui chianga thil dik lo titute hrem turin sorkar an phût.

MNYF hian nimin khan Mizo Hnam Rûnah thuthar thehdarhtute an kâwm a, August 15, 2016-a Dihmunzawla PHE building ṭhiah tawh a hmuna an enfiahnaa an thil hmuh dante leh sum ruahman dan aṭanga an hmuh dante an sawi.

MNYF president K Vanlal-vena chuan, SIPMIU hnuaia Dihmunzawla power 132 KV Sub-Station & Transmission line siam hna thawk tura EMC Ltd., Kolkata-te lilâm leh tender chhuah loa thlan an ni chu thil dik lo a nih thu leh thil dik lo tih tum vang nia an ngaih thu a sawi a, "EMC Ltd. hian sub-contractor ruaiin, GEC Ltd. Silchar-in an thawk a ni," a ti.

K Vanlalvena sawi danin, 132 KV Sub-Station & Transmission siam nan hian cheng 1641.63 ruahman a ni a, November 23, 2013-ah thawk ṭanin, thla 36 chhunga thawh zawh tura tih a ni.

Cheng nuai 63 chuang an dahna, thil an ṭhiahte chu - RCC building pakhat, chhawng hnih, a dung metre 16, a vâng metre 14 te; tuizém bial pakhat, a sàn záwng metre 7 a zau zawng metre 10 (diameter) leh tuizem kil li nei pakhat, a dung metre 10, a vâng metre 5 leh a san zawng metre 7 vel a ni.

K Vanlalvena chuan, bungraw dang senghawi tur a awm lo tih a ṭhiattute'n an hrilh thu sawiin, "Heng ṭhiah
nan leh senghawi nana Rs. 63,08,504 sorkarin a hmang hi thil awihawm loh leh eirukna a awm ngeiah kan ngai," a ti.

MNYF President chuan, bawngraw ṭhiahna bakah, 132 KV Sub-Station siamna hmun tihzawl (earth work) nan Rs. 35,36,838 dah a nih thu sawiin, "Hmun zâwl deuh sa a ni a, laih zâwl belh ngai chu tlemtê a ni," a ti a; cheng nuai 35 chuang sênna chu lei lai ṭhangte'n cheng nuai 4 sênna tur pawh a awm loah an ngai niin a sawi.

Quarters pali kawt dâwl zâwlna leh varanda dona tura lung remna atan Rs. 16,81,262 sên a ni tih sawiin, Vanlalvena chuan, "Quarters-te hi hmun zâwl ṭha tak veka sak an ni a, hna thawktu engineer-te kan zawhnaah lung rem ft. 2f/3 vela sang leh ft. 12 vela sei bak an siam lo a, "Cheng nuai 16 chuang senna retaining wall hi a bo em ni?" a ti.

K Vanlalvena chuan, Di-hmunzawla in leh tuizem ṭhiah man, lei laih man leh retaining wall siam nan Rs. 1,15,26,604 hman ral; a ni tih sawiin, "Ren baksak loa sorkar sum hman ral a ni hi ṭha lo kan ti hle," a ti a; he thila a mawhphurtu - chief minister emaw, minister emaw, department official-te emaw, tu pawh ni se, chhuichhuah ngei ni se an duh thu sawiin, "Thil dik lo titu chu pho ro ni ngei se," a ti.