Manipur Mizote'n Lalduhoma an kâwm

Manipur sorkarin mipui ngaihdan la a, The Manipur Regulation of Non-Local People Act, 2016 draft bill August 9, 2016-a a tihchhuah chungchangah Mizo Peoples Convention (MPC), Manipur hruaitute chuan nimin khan ZNP president Lalduhoma chu a pisaah an hmu.

Manipur Assembly-in August 2015-a bill a pass tâk pathum - The Protection of Manipur People Bill 2015, The Manipur Land Revenue and Land Reforms (Seventh Amendment) Bill 2015 leh The Manipur Shops and Establishments (Second Amendment) Bill-te dodalna kal zelah, MPC hruaitute chuan Manipur sorkarin draft bill a tihchhuah tawh, The Manipur Regulation of Non-Local People Act 2016 pawh Manipur-a tlang mite tan a la him chuang loah an ngai a; "Manipur state Assembly-in pass theih tura ruahmanna a kalpui mek hi kan duh lo bur a ni," an ti.

Lalduhoma chuan, Mizo Peoples Convention dinna chu ZNP dinna a nih thu a sawi a, "Ṭangkaina tur kan neih ve phawt chuan eng lai pawhin kan inkau reng a, a tawp thlengin ZNP chuan kan thlawp tlat dawn a ni," a ti.