Tui meter dik lo leh tlo lo avangin harsatna tâwk tam : Legal Metrology

Legal Metrology hotute chuan, tui meter tlo lo leh dik lo vangin mi tam takin sum an sên thlawn mek thu an sawi a; mipui-te chu tui meter chung-changah fimkhur tura an duh thu Vanglaini an hrilh.

Legal Metrology hotute'n Vanglaini an hrilh danin, tui meter atan hian Mizoramah chuan Aquamet leh Kranti company siam hman a ni a, Legal Metrology aṭanga zawrh phalna neite tan chauh zawrh theih a ni. Tui meter lei tur tan receipt leh warranty card lak ngei tur a ni a, a chhia a awm chuan thleng leh theih a ni.

Tui meter reng reng vuah a nih hmain Legal Metrology office-ah endik tur a, a dik tih finfiahna certifcate lak tur niin, endiktir loh chu man theih a ni. Tui meter dik lo nia rinhlelh nei chuan Legal Metrology office-ah entir theih a ni.

Mi ṭhenkhat, phalna nei lote hnen aṭanga tui meter lei an awm ṭhin a, a chhiatin thleng theih a nih loh avang-in mi tam takin harsatna an tâwk a, receipt leh warranty card an neih loh avangin a thar an lei leh a ngai ṭhin.

Phalna neia tui meter zawrhte chu a chak berah darkar khatah tui litre 5,000 thleng dik taka chhinchhiah thei tura ngaih a nih thu sawiin Legal Metrology hotute chuan, "Kan tui dahnaah a khah hman dawn tho chuan a full-a hawtir kher a ngai lo, a full-a tui hawtir hian meter a chhe duh," an ti.

Legal Metrolgy hotute chuan, tui bill-ah sawi-selna a awm loh nan meter-a in-ziak zat en ṭhin a pawimawh thu sawiin, "Tui hi ni tin haw reng a ni loa, bill lo kal veleh meter reading en ila, bill nen a inmil leh mil loh a hriat theih vek a ni," an ti a; bill pek dawna complaint chauh chuan a buaithlak thu an sawi.