e-Office atan inbuatsaih zel

UDPA department chuan November 1, 2016 aṭanga e-office nih tuma an hmalakna kal zelah nimin khan CS conference hall-ah National Informatics Centre (NIC), New Delhi-a e-office Project Monitoring Unit-te nen video conferencing hmangin thil pawimawh hrang hrang an sawiho.

Conferencing kaihruaitu UDPA minister Zodintluanga chuan, e-office hman thuai a nih theina atan Mizoram sorkarin muangcháng loin, hun tiam chhunga mamawh zawng zawng lei a, tih tur ṭul tihfel hman a tum tih a sawi a, "New Delhi lam an inpeih veleh department chuan hmang ṭan nghal thei turin a inpuahchah fel vek dawn a ni," a ti.

Sorkar thuchhuah tarlan danin, UDPA department e-office atana siam tura inbuatsaihna kal zelah, mamawh turte zir chian a ni tawh a, State Data Centre nena inthlunzawmna tur pawh buaipui thuai tum a ni.

NIC, New Delhi hnenah lehkha pawimawh leh ṭul eng emaw zat thehluh a ni tawh a, sum mamawhte inhlan fel a nih hnuah NIC-in State Data Centre-ah e-office application an dah (install) ang a; chumi hnua a tak taka hmangtu turte zirtir tur master trainer-te tan training buatsaih a ni ang.