112 ERSS-in biak a hlawh Phone top-up thila betu an tam!

August 13, 2019-a hawn, 112 Emergency Response Support System (ERSS) hnuaia Emergency Response Centre, Aizawl SP pisaa mi chuan betu a ngah hle a, chawhrualin, ni khatah phone call 250-300 vel a dawng ṭhin.

112 Emergency Res­ponse Centre-a thawkte hnen aṭanga Vanglaini-in thu a dawn danin, 112 hian biak a hlawh hle a, mahse, a betu tam ber erawh chu top-up thun tum leh an top-up thih hun zawtte an ni.

Damlohna thila damdawi chawh tura ngenna leh police chungchanga hriat chian duh neite chu call an dawn tam zualte a ni bawk. Rîkrum thil leh chhiat­na a thlen chángin 112 hi biak theih reng a ni a, call kher lo pawhin Google leh Apple app store aṭangin biak theihna tur download theih a ni. ERSS hi ambulance, fire service motor leh police motor hmanga thuam a ni a, a ṭul dan azirin rîkrum thil leh chhiatna thlenna hmuna kal turin an inring reng a ni.

Duty-te chuan puih ngai call an dawn chuan an mamawh dan a zirin ambulance, fire service leh police motor te an bia a, anni chu thil thlenna hmunah an kal ṭhin. Phone call an dawn zingah a hmuna kal chilh ngai a tam lo a, kar khatah chawhrualin vawi thumte kal ṭhin ang an ni.