Lailapur-a lirthei dan titâwp

September 12, 2020 aṭanga Silchar Truck Driver Association (STDA) hoin Lailapur-a Mizorama lut tur bungraw phur lirthei an dan chu September 15, Thawhlehni zan dar 9:30 vel khan an titawp a, lirthei tangkhangte Mizoramah an tlân lut nghal.

STDA hian an member zinga Covid-19 vei, Thingdawl CCC enkawl zawng zawngte chhuah phûtin Mizorama lut tur bungraw phur lirthei an dang a ni. Mizoram sorkar (Kolasib DC) erawh chuan Covid-19 la vei mekte chu chhuah a remti lo a, STDA pawhin negative tawhte tal chhuah an nih chuan lirthei dan tihtawp an intiam a ni.

Covid-19 vei tawh lo hnam dang driver/handyman mi 72 chu September 14 tlai khan CCC aṭangin chhuahtir an ni a, zan dar 7:30 velah Lailapur thlenpui an ni. Mi 72 chhuah hnuah STDA chuan Mizoram sorkar lakah thil dang an phût belh a, lirthei an dang chhunzawm leh a; an phût zingah Rapid Antigen Test (RAT) hmanga ramria endik tawh loh a tel.

Kolasib DC chuan, RAT hmanga endik loh chu Mizo mipui tana a him loh avangin a remti loa, endik zel a nih tur thu a hrilh. STDA-te chuan hun eng emaw chen lirthei an dan chhunzawm hnuah, Thawhlehni zan dar 9:30 vel khan lirthei dan an titawp a ni.

Mizoram páwn aṭanga bungraw phur lirthei khalh­tu leh puitute chu checkgate-ah RAT hmanga endik chhunzawm zel a ni ang.