1% velin test man an chawi - Health dept.

Health department chuan thuchhuah siamin, April 7, 2020 aṭanga September 15, 2020 thlengin Mizoramah sorkar hmalaknain swab sample 52,565 endik a nih tawh thu an tarlang a, "Test man chawi chu 1% vel chauh an ni," an ti.

Health department tarlan danin, Zoram Medical College (ZMC) laboratory-ah April 7, 2020 aṭangin RT-PCR hmangin swab sample endik a ni a, Mizoram sorkarin RT-PCR khawl pathum a neih hnuah chak lehzualin endik hna an thawk.

TrueNAT test chu Lungleiah June 12, 2020 aṭangin tih ṭan a ni a, district tinah TrueNAT khawl bun tawh a ni. Rapid Antigen Test (RAT) chu August 6, 2020-ah ṭan a ni thung.

Swab sample test chu a thlâwn vekin rei tak kalpui a ni a, a hautak avangin Indian Council of Medical Research (ICMR) criteria-in a huam loh - mimal duh thu leh mamawhna vanga test duh te, mimal sumdawnna leh ṭul vanga Mizoram páwna chhuak turte leh state páwn aṭanga rawn lut te, mimal ṭulna vanga Mizoram lut central PSU, private agency, central armed paramilitary forces (CAPF)-a thawkte zawng zawng vantlang sum sénga a thlawna endik vek chu a hautak a, Mizoram mipui lakah pawh a inthlahrunawmah an ngai.

Mahni hna leh sumdawnna thila zin veivâk, sum lama harsatna nei lote chu swab test senso chawi tawh se tih rawtna a awm a, state sorkarin pawmin, July 30-ah notification a tichhuak a, chu chu August 24-ah siamṭhat leh a ni. Swab test chu category-ah ṭhen a ni a, a tam zawk chu a thlâwna test zel tura tih a nih laiin, category ṭhenkhatah chuan test man lak tawh ni se, tih a ni.

Swab test man lak loh (free)-te chu - ICMR guidelines-in test ngai a tih zawng zawng - Covid-19 donaa a hmatáwng (frontline worker) te, contact tracing aṭanga test ngaite leh hri kai enkawl mekte an ni. Test man chawi tura tih zingah sum lama harsatna nei - BPL card neite leh LTF/VTF-te'n test man pe lo tura an dilpui te, BPL card holder ni lo, khawsak harsa dangte pawh a thlâwna endik zingah an tel.

Endik man chawi tura tihte chu -  August 1 hnua Mizoram páwn aṭanga Mizorama rawn lut quarantine centre-a awm te, hotel leh mahni ina inkhung hrangte'n subsidised rate-in RTPCR-ah Rs. 2,500 leh TrueNAT-ah Rs. 1,500 an chawi a ngai. August 1, 2020 hmaa Mizorama lutte a huam loh avangin migrant worker (Mizoram páwna inhlawhfa rawn haw) zinga a tam ber chu hei hian a huam lo.

Mahni duh thu liau liaua endik duh leh eng emaw vanga certificate mamawhte chauhin a man to zawk (RTPCR - Rs. 4,500 leh TrueNAT Rs. 3,000) chawiin an endiktir thei a, chu‘ngte chu ICMR guidelines-in a huam loh, an mimal thila test mamawh site an ni. Thuchhuah chuan, "An tana test theihna turin remchanna sorkarin a siam zawk a, RAT hi chu tun thlengin a free-a kalpui a ni," a ti.

(Sept. 15, 2020 angin)

Hmanrua    Endik zat

RT-PCR    36,593

TrueNat-PCR    2,308

RAT    13,664

TOTAL    52,565