Covid-19: Mizoram dinhmun Hripui vei 12 hmuh belh a ni

September 15, Thawh­lehni khan Mizoramah Covid-19 vei mi 12, taksaa harsatna nei lo vek hmuh chhuah a ni a, Mizorama hripui vei hmuh tawh zawng zawng chu mi 1,480 an ni. Nimin khan mi pasarih chhuahtir an ni thung.

Thawh­lehnia Covid-19 vei hmuh chhuahte chu - ZMC laboratory-a RT-PCR hmanga hmuh mi pali, Serchhip District Hospital leh Serchhip District Hospital-ah TrueNAT-PCR hmanga hmuh mi pakhat ve ve, Rapid Antigen Test (RAT) hmanga Kolasib district-a hmuh chhuah mi pahnih leh, Serchhip district-a hmuh chhuah mi pali an ni.

Hetih lai hian, nimin khan Covid-19 vei zinga dam tawh mi pasarih chhuahtir an ni a; Berawtlang CCC aṭangin mi pali, Kolasib CCC aṭangin pahnih leh Chhiahtlang CCC aṭangin mi pakhat an chhuak a ni.

Mizorama Covid-19 vei hmuh chhuah tawh mi 1,480-te chu mipa 1,218 leh hmeichhia 262 an ni a; an zinga mi 929 (62.77%) chu chhuahtir an ni tawh a, mi 551 (37.23%) an la chhuak lo. La chhuak lo zingah hripui vei tawh lo, negative tawh an awm nual bawk.

September 15 khan ZMC labo­ratory-a mi 1,158 swab sample endik aṭangin Covid-19 vei mi pali, mipa leh hmeichhia pahnih ve ve hmuh chhuah a ni a, Mizoram chhunga kái chhâwng (local positive contact) vek niin, symptom an nei lo. An pali hian Aizawl district-a mi vek an ni a, pathum chu hripui donaa a hmatáwnga thawk (frontline worker) an ni.

Aizawla hripui vei hmuh thar zinga frontline worker-te chu swab sample latu (sample collection team)-a tel an ni a; mipa pahnih (kum 25 & 33), Hlimen & Bethlehem Vengthlanga mite leh, hmeichhia kum 31 mi, Bawngkawna chengte an ni. Mi dang pakhat pawh hmeichhia kum 54, Chawnpui venga mi, Health department-a thawk a ni bawk.

Thawhlehni khan Serchhip District Hospital laboratory-ah TrueNAT-PCR hmangin Covid-19 vei mipa pakhat, kum 34, Tinsukia, Assam aṭanga Mizorama rawn lut hmuh chhuah a ni a, quarantine facility-a awm lai a ni.

Mamit District Hospital laboratory-ah pawh a vawi khat nan Thawhlehni khan swab sample endik ṭan niin, sample 21 endik zingah hripui vei pakhat hmuh chhuah nghal a ni a; mipa kum 36 mi, Power & Electricity department hnuaia hna thawk, Assam aṭanga rawn lut niin, quarantine facility-ah a awm mek.

RAT hmangin September 15 khan Bairabi-ah ramria entry point-ah Covid-19 vei mipa pahnih hmuh chhuah a ni a, Assam lam mi, Mizorama lut tur, truck driver/handyman an ni. RAT hmang vêkin Serchhipah Covid-19 vei mi pali, BSF sipai vek hmuh chhuah a ni bawk.

September 15 khan ZMC-ah mi 1,158-te swab sample endik a ni a, district pariata TrueNAT laboratory-ah mi 126 leh RAT hmangin district pasarihah mi 293-te sample endik a ni.