KHAWTHLIR

State NSS Cell ruahmannain nimin khan NSS volunteer mipa 15 leh hmeichhia pathumte’n Aizawl Civil Hospital blood bank-ah thisen unit 18 an pe. Thisen petu chu J Thankima College aṭangin mi panga, Helen Lowry HSS aṭangin mi paruk, Helen Lowry College aṭangin mi paruk leh Synod HSS aṭangin mi pakhat an ni. NSS hian Mizorama lockdown chhungin Aizawl Civil Hospital-ah thisen pek ṭum 16 an huaihawt tawh.

Horticulture department leh ATMA ṭangkawp chuan nimin khan Horticulture conference hall-ah ‘Training on Dragon Fruit Cultivation and Distribution of Assistance for Beneficiaries under MIDH’ an buatsaih. Dragon fruit chíng tura thlante hnenah dragon fruit (zung nei sa) 600, leiṭha, kutkawr, tui pekna leh hmanraw dangte leh Rs. 60,000 ṭheuh pek a ni.

Serchhip DC Kumar Abhishek chuan nimin khan thupek chhuahin, an district-a lui hrang hranga sanghate tûra hrai, dynamo leh gelatine hmanga man leh nghafuan vên khap a ni tih a puang. Thupek hian thla hnih chhung a huam ang.

Aizawl DC chuan nimin khan thupek chhuahin, Aizawl district-a PSU, company, consultant firm leh hmasawnna hna thawktu, state páwn aṭanga worker/labourer chah chhuak turte chu an mi rawihte khung hranna hmun tur, anmahni'n an enkawl theih nei turin a hriattir. Sorkar quarantine centre indaih lohna avang leh hna thawktu châwk luh a khaihlak lohna tura ruahman a nih hi DC thuchhuah chuan a tarlang.

State Referral Hospital (ZMC)-ah Covid-19 vei mi 126 enkawl mek a ni a, an zinga mi 38 chu nimina dah luh an ni. SRH-ZMC Bulletin tarlan danin, mi 126 zinga pahnih chu ICU enkawl niin, ngaihtuahawm erawh an ni lo a, SICU-ah pakhat leh Isolation ward-ah mi 123 an awm. Nimin vek khan rinhlelh thilah mi paruk dah luh an ni a, a awm sa zinga pathum chu Berawtlang CCC-ah sawn an ni thung.