Tanklorry driver kut thlak avangin MTDA-in Dholai PS-ah FIR an thehlut

Mizoram Tanker Driver's Association (MTDA) chuan, an member, Silchar Truck Driver Association (STDA) mi leh sate'n kut an thlak avang leh motor an tihchhiat avangin nimin khan Mizoram police kaihhruainain Dholai Police Station-ah FIR an thehlut.

Vanglaini palai zawhna chhangin MTDA president Ronel Lalruatdika chuan, an member-te kutthlak a nih avang leh motor-te tihchhiat an nih avangin an lungawi lo hle tih a sawi a, "Hmalakna a awm a nih loh chuanin state dangte a ni si a, kan member-te oil phur hian an kal ngam tawh lo. Hmalakna awm hma chu oil phura kal tawh loh kan tum," a ti.

Ronel Lalruatdika sawi danin, Dholai PS-a thawktute'n MTDA hruaitute chu an lo dawngsawng ṭha a, police OC-in STDA President pawh telephone-in a be nghal. FIR an thehluh zawhah STDA President chuan Vairengte SDPO a be nghal a, MTDA President phone number a dil a ni.

MTDA President chuan, STDA lamin an rawn bia a, ngaihdam an dil a nih chuan an ngaihdam theih lohna tur a awm loh thu a sawi a, "Kan member-te kut an thlak a, an motor-te an tichhiat laia an ngawi reng hi kan thinrimna tizualtu a ni," a ti.