Inthlan kaihhnawiha Covid-19 veite Zángnadawmna pe turin sorkar phût

Mizoram Pradesh Youth Congress Committee (MPYCC) chuan nimin khan thuchhuah siamin, village/local council inthlan kaihhnawiha Covid-19 kaite hnenah zángnadawmna pe turin Mizoram sorkar an phût.

MPYCC chuan, mipui vantlangah Covid-19 a darh lohna tura thawktu, a hmatáwnga ṭangte'n theihtawp an chhuah leh, mi tam takin LC leh VC inthlan ti rih lo tura an ngen ngawih ngawih laiin Mizoram sorkarin inthlan a buatsaih lui tih sawiin, "Covid-19 nasa takin a darh phah mek. August 27, 2020 leh a hnu lama inthlan avangin hripui chu mipuiah chhui hleih theih lohin a darh a, hei vang hian lockdown puan a ngai leh ta hial a ni," an ti a; mipuiin hripui bakah, ei leh bârah nasa taka an tawrh mek thu an tarlang.

Congress ṭhalaite chuan, inthlan vanga Covid-19 a darh zual hnua lockdown puan chhungin ni tin eichawp zawnga inhlawh leh feh ṭhin te, kawng hrang hranga sumdawnna lama eizawngte, leh inthlan kaihhnawiha hripui kai phahte'n harsatna nasa tak an tâwk tih sawiin, "An ei leh bâr zawnna a sukuk phah nasa hle. Hengte avang hian sorkar hian zangnadawmna siamsak rawh se," an ti.

Tun hnaia Covid-19 vei hmuh tharte chu inthlan kaihhnawih a nih deuh zel tâk thu sawiin MPYCC chuan, "Sorkar hian mipuiah ngaihdam a dil rin a nih mek laiin, hripui inkai darh chu mipui a puh lêt a, mipui fimkhur loh vang a ti ta hlauh hi thil zahthlak tak a tling," an ti a; sorkar chu a tihsual luihah mipui an puh avangin an dem thu an sawi.

MPYCC tarlan danin, September 14, 2020-a sorkar press release No. 5068/2020-2021 ah chuan, SAD Conference Hall-a Health Minister hoa Covid-19 chungchang rêlnaah, 'Positive tharte an chhui chiannaah case tam ber chu mipuite fimkhurna kawnga kan inthlahdul deuh vang nia a lan thu tarlan a ni,' tih a ni.

Congress ṭhalaite chuan, mipui hnen­a thu dik thehdarh kawnga thawktu jour­nalist-te chu frontline worker-ah pawm a, hripui an tawrh palh pawha frontline worker-te hamṭhatna awm thei ang neihtir ve turin sorkar an phût tih an tarlang bawk.