VIP tan bika CCC siam ṭha lo an ti

BJP, Mizoram Pradesh chuan thuchhuah siamin, VIP (very important person)-te tan bika Covid Care Centre (CCC) hmanhmawh taka siam a ni chu ṭha lo an tih thu leh, Mizoramah mirethei sorkar aia VIP sorkar a ding chu vanduaithlak an tih thu an tarlang.

Mizoram BJP chuan, "September 15, 2020-a sorkar thuchhuahin a tarlan, VIP-te tana CCC hmanhmawh taka siam a ni chu ṭha lo kan ti hle. BJP central sorkarin 'VIP culture' a tihbo mek laiin, Mizoram sorkar chuan VIP a la duhsak uchuak fál hle," an ti.

BJP chuan an MLA Dr BD Chakma pawhin Covid-19 a vei thu sawiin, "Dr BD Chakma hi ZMC-ah an dah laiin, Health secretary Pu Engmawia chu nuamsa takin a inah an la awmtir a ni," an ti a; Mizoramah hleih nei sorkar a ding chu vanduaithlak an tih thu an tarlang.

Mizoramah VIP leh an chhungkuaa mite'n hripui an kai ṭan tih sawiin, "New MLA Hostel chu CCC atan sorkarin a buatsaih nghalte hi mahni inhmangaihtute tih âwm tâwkah kan ngai. India ram Home Minister leh MP tam tak pawh Covid-19 positive an nih khan, damdawi-in pangngaiah an dah mai a ni," an ti. Mizoramin sorkarin châwm hlâwm state ni chunga hripui léng karah a VIP-te uchuak taka a duhsak chu ṭha lo an tih thu sawiin, Mipui hmakhua ngaiin, VIP bik tana CCC siam an tum hi ṭhulh leh turin kan ngen a ni," an ti.

BJP chuan, Mizoram sorkarin swab sample endikna man chu a to bik avangin ṭha lo an tih thu sawiin, "State dangte pawhin Rs. 1,500-a an tih theih laia keini ram rethei zawkte tana Rs. 4,500 a ngai hi sorkar hian ngaihtuah nawn leh se, tláwm zawka mipuite'n an chhawr theihna turin ruahmanna thar siam se tih hi kan ngenna a ni," an ti bawk.