Central YMA-in ruihhlo do kawngah Thawhpui turin Governor an sáwm

Central YMA hruaitute chuan nimin khan an president Vanlalruata hoin Raj Bhavan-ah Governor PS Sreedharan Pillai an kâwm a; ruihhlo do kawnga Central YMA thawhpui tur leh a ṭul anga pui turin an sáwm.

Governor chuan, YMA chu India rama tlawmngai pawl chak leh thawh hlâwk ber zinga mi anga a lo hriat tawh ṭhin thu a sawi a; khawtlang rawngbawlna kawngah an thawhrimna aṭanga an hlawhtlinna tam takte avangin YMA chu lawmpuina a hlân.

CYMA hruaitute chuan Larsap zawhna chhangin, Mizo hnam thil leh hnam ziaráng humhalh a ṭul thu leh ruihhlo do kawnga an tih theih chin bakah a puihna an mamawh thu an hrilh. Mizoram, India leh Myanmar inrìna hrûl chu free border regime huam chhung a nih avangin, awlsam taka inkalpawh theih a nih thu sawiin, CYMA hruaitute chuan, "Hei vang hian heng lai hmunah hian ruihhlo tawlh luh a hluar hle a, a tuartute chu Mizo ṭhalaite an ni," a ti a; ruihhlo do kawngah chak zawka sorkar nen an thawh dun zel theihna tura ṭanpui turin Governor hi an sáwm a ni.

Bangladesh aṭanga dan loa Mizorama lut tam tak, Chakma Autonomous District Council huam chhungah an inbéngbel mek zel chu ṭha lo an tih thu sawiin CYMA hruaitute chuan, "Ramri venhimna atan CRPF, Mizo hlang awmna Union Home Minister-in a lo tiam tawh hi tihhlawhtlin thuai a ngai a ni," an ti. Indian Constitution-a 8th Schedule-ah Mizo ṭawng telh a nih loh avanga Mizo ṭhalaite'n harsatna an tawh chungchang sawiin CYMA hruaitute chuan, 8th Schedule hnuaia official language pakhat ni turin Mizo ṭawng dah luh a nih ve theih nan hma la turin Governor an ngen. HIV/AIDS pung chak chungchang pawh an vei thu sawiin CYMA hruaitute chuan, "Theihtawp min chhuahpui turin kan ngen che a ni," an ti bawk. PS Sreedharan Pillai chuan, CYMA hruaitute chu an ngaih pawimawh deuh deuhte ziaka thlen turin a hrilh a; sorkar hotu lu ber a nih angin, a tih turte chu zir chiang hmasaa a tih zel tur thu a sawi a ni.