Village/local council inthlan atan hming pek luh hun a tawp dawn

February 12, 2025-a village council leh local council inthlan lo awm tura chuh tumte tana hming pek luh hun chu vawiin tlai dar 3 hian a tawp dawn.

State Election Commission (SEC) chuan VC leh LC inthlan tur hi January 16, 2025 khan a puang a, inthlan puan aṭangin candidate turte tan hming pek luh theih a ni. Khua leh veng eng emaw zatah chuan LC leh VC chuh tumte'n hming an pe lut tawh a, hmun ṭhenkhatah chuan vawiinah pek luh an tum.

VC leh LC inthlan chuh tuma hming pek luhte chu January 24-ah endik a ni dawn a, inhnûkdâwk duhte tan January 27, 2025 tlai dar 3 thleng hun hawn a ni ang.

Inthlanah hian February 12, Nilaini zing zing dar 7 aṭanga tlai dar 4 thleng vote thlak a ni dawn a, zan dar 7 aṭangin vote chhiar ṭan a ni ang. Inthlan ṭhat ngai a awm chuan February 13, 2025-ah vote thlak ṭhat tur a ni.